തിന്മയും തിന്മയും തമ്മിലുള്ള യുദ്ധം പ്രഖ്യാപിച്ചു കൊണ്ടുള്ള ലൂസിഫറിന്റെ വരവിനെ ആഘോഷമാക്കി സോഷ്യല് മീഡിയ. വമ്പന് സ്വീകരണമാണ് ലൂസിഫറിന്റെ ട്രെയിലറിന് സോഷ്യല് മീഡിയയില് ലഭിച്ചു കൊണ്ടിരിക്കുന്നത്. മാസ്മരിക വിഷ്വല്സും മോഹന്ലാല് നടന്റെ അഭിനയ മികവും പഞ്ച് ഡയലോഗുകളുമാണ് ട്രെയിലറിനെ ആരാധകര്ക്ക് ഏറെ പ്രിയങ്കരമാക്കിയിരിക്കുന്നത്. പുറത്തിറങ്ങി 15 മണിക്കൂര് പിന്നിടുമ്പോള് ട്രെയിലറിന് 24 ലക്ഷത്തിന് മേല് കാഴ്ചക്കാരായിട്ടുണ്ട്. ഇതോടെ ഏറ്റവും വേഗത്തിൽ 20 ലക്ഷം കടക്കുന്ന ആദ്യ മലയാള ട്രെയിലർ എന്ന റെക്കോഡ് ലൂസിഫറിന്റെ പേരിലായി. യൂട്യൂബില് ട്രെന്ഡിംഗിലും ട്രെയിലര് ഒന്നാമതാണ്.
പൊളിറ്റിക്കല് ത്രില്ലര് ഗണത്തില് പെടുന്ന ചിത്രത്തില് സ്റ്റീഫന് നെടുമ്പിള്ളി എന്ന രാഷ്ട്രീയ പ്രവര്ത്തകനെയാണ് മോഹന്ലാല് അവതരിപ്പിക്കുക. വലിയ മുതല് മുടക്കില് ഒരുങ്ങുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് മുരളി ഗോപിയാണ്. മഞ്ജു വാര്യരാണ് ചിത്രത്തില് നായിക. ബോളിവുഡ് താരം വിവേക് ഒബ്റോയി ആണ് വില്ലന്. ഇന്ദ്രജിത്ത്, കലാഭവന് ഷാജോണ്, ടൊവിനോ, ഫാസില്, മംമ്ത, ജോണ് വിജയ് എന്നിവരാണ് മറ്റുതാരങ്ങള്.
Read more
ആശീര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് ലൂസിഫര് നിര്മ്മിക്കുന്നത്. ഛായാഗ്രഹണം സുജിത്ത് വാസുദേവ്. സംഗീതം ദീപക് ദേവ്. ചിത്രം മാര്ച്ച് 28 ന് തിയേറ്ററുകളിലെത്തും.