അതിര്‍ത്തിയിലെ സംഘര്‍ഷാവസ്ഥക്കിടയില്‍ മാതൃരാജ്യത്തിനോടൊപ്പമാണെന്ന് പ്രഖ്യാപിച്ച് കമല്‍ ഹാസന്‍. മെയ് 16ന് നടത്താനിരുന്ന പുതിയ ചിത്രം ‘തഗ് ലൈഫി’ന്റെ ഓഡിയോ ലോഞ്ച് മാറ്റി വച്ചതായി കമല്‍ ഹാസന്‍ പത്രക്കുറിപ്പിലൂടെ അറിയിച്ചു. ചെന്നൈയില്‍ നടത്താനിരുന്ന ഓഡിയോ ലോഞ്ച് ആണ് മാറ്റി വച്ചിരിക്കുന്നത്.
”കലയ്ക്ക് കാത്തിരിക്കാം, ഇപ്പോള്‍ മാതൃരാജ്യത്തോടൊപ്പം. നമ്മുടെ രാജ്യാതിര്‍ത്തിയില്‍ നടക്കുന്ന സംഭവങ്ങളും നിലവിലെ ജാഗ്രതയും കണക്കിലെടുത്ത്, മെയ് 16ന് നടത്താനിരുന്ന തഗ് ലൈഫിന്റെ ഓഡിയോ ലോഞ്ച് മാറ്റി വച്ചിരിക്കുകയാണ്. നമ്മുടെ മാതൃരാജ്യത്തിനായി സൈനികര്‍ അചഞ്ചലമായ ധൈര്യത്തോടെ മുന്‍നിരയില്‍ നില്‍ക്കുമ്പോള്‍ നമുക്ക് ആഘോഷിക്കാനുള്ള സമയമല്ല, അവര്‍ക്ക് ഐക്യദാര്‍ഢ്യം പ്രഖ്യാപിക്കുന്നു.”
”പുതിയ തീയതി പിന്നീട് കൂടുതല്‍ ഉചിതമായ സമയത്ത് പ്രഖ്യാപിക്കും. ഈ സമയത്ത് നമ്മുടെ രാജ്യത്തെ സംരക്ഷിക്കുന്നതിനായി ജാഗ്രതയോടെ നിലകൊള്ളുന്ന നമ്മുടെ സായുധസേനയിലെ ധീരരായ പുരുഷന്മാരെയും സ്ത്രീകളെയും കുറിച്ചാണ് ചിന്തകള്‍. പൗരന്മാര്‍ എന്ന നിലയില്‍, സംയമനത്തോടെയും ഐക്യദാര്‍ഢ്യത്തോടെയും പ്രതികരിക്കേണ്ടത് നമ്മുടെ കടമയാണ്” എന്നാണ് കമല്‍ ഹാസന്‍ പങ്കുവച്ച പ്രസ്താവനയില്‍ പറയുന്നത്.
അതേസമയം, ജൂണ്‍ 5 ആണ് തഗ് ലൈഫിന്റെ റിലീസ് തിയതി. സിമ്പു, തൃഷ, നാസര്‍, ജോജു ജോര്‍ജ്, അലി ഫസല്‍, അശോക് സെല്‍വന്‍, നാസര്‍, വയ്യാപൂരി, ഐശ്വര്യ ലക്ഷ്മി, അഭിരാമി, സാനിയ മല്‍ഹോത്ര എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്. ഛായാഗ്രാഹകന്‍- രവി കെ ചന്ദ്രന്‍, സംഗീത സംവിധായകന്‍ എ ആര്‍ റഹ്‌മാന്‍.
Read more
എഡിറ്റര്‍ ശ്രീകര്‍ പ്രസാദ്, ആക്ഷന്‍ സംവിധായകരായ അന്‍ബരിവ് എന്നിവര്‍ തഗ് ലൈഫിന്റെ സാങ്കേതിക സംഘത്തിലുണ്ട്. കമല്‍ ഫിലിം ഇന്റര്‍നാഷണല്‍, മദ്രാസ് ടാക്കീസ് എന്നീ ബാനറുകളില്‍ കമല്‍ ഹാസന്‍, മണി രത്‌നം, ആര്‍ മഹേന്ദ്രന്‍, ശിവ ആനന്ദ് എന്നിവരാണ് തഗ് ലൈഫിന്റെ നിര്‍മ്മാതാക്കള്‍. പിആര്‍ഒ- പ്രതീഷ്ശേഖര്.
