ഐപിഎല്‍ വെറ്ററന്‍ ദിനേശ് കാര്‍ത്തിക് ഈ സീസണിന് ശേഷം ഐപിഎല്ലില്‍നിന്ന് വിരമിക്കുമെന്ന് സൂചന നല്‍കി. മാര്‍ച്ച് 22 വെള്ളിയാഴ്ച ചെപ്പോക്ക് സ്റ്റേഡിയത്തില്‍ ചെന്നൈ സൂപ്പര്‍ കിംഗ്‌സിനോട് അദ്ദേഹത്തിന്റെ ടീം തോറ്റതിനെ തുടര്‍ന്നാണ് താരം വിരമിക്കലിനെ കുറിച്ചുള്ള സൂചന നല്‍കിയത്. ഈ വേദിയിലെ തന്റെ അവസാന ഐപിഎല്‍ മത്സരമായിരിക്കും ഇതെന്ന് കാര്‍ത്തിക് പറഞ്ഞു.
ലീഗിന്റെ തുടക്കം മുതല്‍, കൊല്‍ക്കത്ത നൈറ്റ് റൈഡേഴ്സിന്റെ ക്യാപ്റ്റന്‍ പദവി ഉള്‍പ്പെടെ, വര്‍ഷങ്ങളായി ആറ് വ്യത്യസ്ത ഐപിഎല്‍ ടീമുകള്‍ക്കായി കാര്‍ത്തിക് കളിച്ചിട്ടുണ്ട്. പുതിയ സീസണ്‍ ആരംഭിക്കുന്നതിന് മുമ്പ്, കമന്ററിയിലേക്ക് ശ്രദ്ധ തിരിക്കാന്‍ ഈ ഐപിഎല്‍ സീസണിന് ശേഷം കാര്‍ത്തിക് വിരമിച്ചേക്കുമെന്ന് റിപ്പോര്‍ട്ടുകള്‍ പുറത്തുവന്നിരുന്നു. മത്സരത്തിന് ശേഷമുള്ള വാര്‍ത്താ സമ്മേളനത്തില്‍ താന്‍ വിരമിക്കല്‍ പരിഗണിക്കുന്നതായി കാര്‍ത്തിക് സ്ഥിരീകരിച്ചു.
ഇത് ചെപ്പോക്കിലെ തന്റെ അവസാന മത്സരമായിരിക്കുമോ എന്ന ചോദ്യത്തിന്, ചെന്നൈയില്‍ പ്ലേ ഓഫ് നടന്നാല്‍ മടങ്ങിവരുമെന്ന് പ്രതീക്ഷിക്കുന്നതായി കാര്‍ത്തിക് പ്രതികരിച്ചു. എന്നിരുന്നാലും, പ്ലേഓഫ് മറ്റെവിടെയെങ്കിലും ആണെങ്കില്‍, ഇത് സ്റ്റേഡിയത്തിലെ തന്റെ അവസാന മത്സരമായിരിക്കാമെന്ന് അദ്ദേഹം സമ്മതിച്ചു.
Read more
ഇതൊരു മികച്ച ചോദ്യമാണ്. ഇവിടെ ഇത് എന്റെ അവസാന മത്സരമല്ലെന്ന് ഞാന്‍ ആത്മാര്‍ത്ഥമായി പ്രതീക്ഷിക്കുന്നു. കാരണം ഞങ്ങള്‍ക്ക് ഈ വേദിയില്‍ പ്ലേ ഓഫ് ഗെയിമുകള്‍ കളിക്കാനുള്ള അവസരമുണ്ട്. അങ്ങനെ സംഭവിച്ചാല്‍ അതായിരിക്കും എന്റെ ഈ വേദിയിലെ അവസാന മത്സരം. പക്ഷേ അത് സംഭവിച്ചില്ലെങ്കില്‍, ഇത് എന്റെ ഈ വേദിയിലെ അവസാന മത്സരമാണെന്ന് ഞാന്‍ കരുതുന്നു- കാര്‍ത്തിക് പറഞ്ഞു.
