ക്രിക്കറ്റ് ആരാധകരെ ഞെട്ടിപ്പിക്കുന്ന മറ്റൊരു സംഭവത്തിൽ, നേപ്പാളിന്റെ സ്റ്റാർ ലെഗ് സ്പിന്നർ സന്ദീപ് ലാമിച്ചനെ പ്രായപൂർത്തിയാകാത്ത പെൺകുട്ടിയെ ബലാത്സംഗം ചെയ്തതായി ആരോപണങ്ങൾ ഉയർന്നിരുന്നു. ക്രിക്കറ്റ് താരത്തിനെതിരെ ഇരയായ പതിനേഴുകാരി കാഠ്മണ്ഡു പോലീസിൽ പരാതി നൽകിയതോടെയാണ് സംഭവം ശ്രദ്ധയിൽപ്പെട്ടത്. സംഭവുമായി ബന്ധപ്പെട്ട് അറസ്റ്റ് വാറന്റ് വന്ന സാഹചര്യത്തിലാണ് സന്ദീപ് തന്റെ പ്രതികരണം നടത്തിയിരിക്കുന്നത്. താൻ ഒരു തെറ്റും ചെയ്തിട്ടില്ല എന്നും നിരപരാധിയാണെന്നും ഏത് അന്വേഷത്തെയും നേരിടാൻ തയാറാണെന്നും സന്ദീപ് പറയുന്നു.
റിപ്പോർട്ട് അനുസരിച്ച്, പ്രായപൂർത്തിയാകാത്ത കുട്ടിയെ ആരോഗ്യ പരിശോധനയ്ക്ക് അയച്ചിട്ടുണ്ടെന്നും അന്വേഷണം ആരംഭിച്ചതായും കാഠ്മണ്ഡു വാലി പോലീസ് ഓഫീസ് മേധാവി രവീന്ദ്ര പ്രസാദ് ധനുക്ക് സ്ഥിരീകരിച്ചു. പരാതിയെത്തുടർന്ന് വ്യാഴാഴ്ച (സെപ്റ്റംബർ 8) അറസ്റ്റ് വാറണ്ട് ലഭിച്ചു. കൂടുതൽ അന്വേഷണത്തിനായി സന്ദീപ് ലാമിച്ചാനെതിരെ ജില്ലാ കോടതി അറസ്റ്റ് വാറണ്ട് പുറപ്പെടുവിച്ചതായി കാഠ്മണ്ഡു ജില്ലാ പോലീസ് വക്താവ് ദിനേഷ് മൈനാലി എഎഫ്‌പിയോട് പറഞ്ഞു.
അറസ്റ്റ് വാറണ്ടിന് ശേഷം ക്രിക്കറ്റ് അസോസിയേഷൻ ഓഫ് നേപ്പാൾ (CAN) അദ്ദേഹത്തെ സസ്പെൻഡ് ചെയ്തു. പൂർണ്ണമായ അന്വേഷണം വരെ ലാമിച്ചനെയുടെ സസ്പെൻഷൻ നിലനിൽക്കുമെന്ന് CAN ന്റെ ആക്ടിംഗ് സെക്രട്ടറി പ്രശാന്ത് വിക്രം മല്ല പറഞ്ഞു.
പരാതി അന്വേഷിക്കുന്ന കാഠ്മണ്ഡുവിലെ പോലീസിൽ റിപ്പോർട്ട് ചെയ്യാൻ ലാമിച്ചനെ വിളിപ്പിച്ചിട്ടുണ്ടെന്നും അദ്ദേഹം പറഞ്ഞു. ബോർഡ് യോഗത്തിന് ശേഷമാണ് അദ്ദേഹത്തെ സസ്പെൻഡ് ചെയ്യാൻ തീരുമാനിച്ചത്.
നേപ്പാളിൽ ഏറ്റവും കൂടുതൽ ആരാധകരുള്ള താരമാണ് സന്ദീപ്. ഇന്ത്യൻ പ്രീമിയർ ലീഗ്, ഓസ്‌ട്രേലിയയുടെ ബിഗ് ബാഷ് ലീഗ്, ബംഗ്ലാദേശ് പ്രീമിയർ ലീഗ്, ലങ്ക പ്രീമിയർ ലീഗ്, കരീബിയൻ പ്രീമിയർ ലീഗ് എന്നിവയുൾപ്പെടെ ലോകമെമ്പാടുമുള്ള ടി20 ലീഗുകളിൽ കളിച്ചിട്ടുള്ള ഏക വ്യക്തിയാണ് അദ്ദേഹം.
Read more
നിലവിൽ കരീബിയൻ പ്രീമിർ ലീഗിൽ കളിച്ചുകൊണ്ടിരുന്ന താരം ലീഗിൽ നിന്ന് പിന്മാറി നാട്ടിലേക്ക് തിരിച്ചിട്ടുണ്ട്.
