ഫാരിസ് അബൂബക്കര്‍ വിവാദത്തില്‍ പരിഹാസവുമായി പൊതുമരാമത്ത് മന്ത്രി മുഹമ്മദ് റിയാസ്. വിവാദ വ്യവസായി ഫാരിസ് അബൂബക്കര്‍ പിണറായി മുഹമ്മദ് റിയാസിന്റെ അമ്മാവനാണ് എന്ന് കേരളാ കോണ്‍ഗ്രസ് നേതാവ് പി സി ജോര്‍ജ്ജ് ആരോപിച്ചിരുന്നു. ഇതിനെക്കുറിച്ചാണ് തനിക്കൊരുഅമ്മാവനക്കൂടി കിട്ടിയെന്ന് മുഹമ്മദ് റിയാസ് പരിഹസിച്ചത്.
താന്‍ ഇതുവരെ ഫോണില്‍ക്കൂടി പോലും സംസാരിക്കാത്തയാളാണ് ഫാരിസ് അബൂബക്കറെന്നും മുഹമ്മദ് റിയാസ് പറഞ്ഞു. “എന്റെ ഉമ്മാക്ക് അഞ്ച് സഹോദരന്മാരാണുള്ളത്. അബ്ദുറഹിമാന്‍, അബ്ദുള്‍ അസീസ്, മുജീബ് റഹിമാന്‍, അബ്ദുള്‍ ഷുക്കൂര്‍, അബ്ദദുള്‍ റഷീദ്. ഇപ്പൊ ഒരു പുതിയ അമ്മാവനെ കൂടി കിട്ടിയിരിക്കുകയാണ്. ഫോണില്‍ പോലും വര്‍ത്താനം പറയാത്ത ഒരു അമ്മാവനെയാണ് കിട്ടിയത്. എന്നെങ്കിലും കാണാന്‍ സാധിക്കുമായിരിക്കും. അങ്ങനെയൊരു അമ്മാവനെ കിട്ടിയതില്‍ സന്തോഷം പങ്കുവെക്കുന്നു.” മാധ്യമപ്രവര്‍ത്തകരുടെ ചോദ്യത്തിന് മറുപടിയായി റിയാസ് പറഞ്ഞു.
‘ആരോപണം ആര്‍ക്കും ഉന്നയിക്കാമെന്നും അദ്ദേഹം പറഞ്ഞു. മുഹമ്മദ് റിയാസിന്റെ ബന്ധുവായ ഫാരിസ് അബൂക്കറിനെ സംരക്ഷിക്കുന്ന നിലപാടാണ് മുഖ്യമന്ത്രിയുടേതെന്നും പി സി ജോര്‍ജ്ജ് ആരോപിച്ചിരുന്നു.
Read more
അതേ സമയം കൊച്ചിയിലുംപരിസര പ്രദേശങ്ങളിലും ഫാരിസ് അബൂബക്കര്‍ ഭൂമിവാങ്ങിക്കൂട്ടിയെന്നും ഇതിന്റെ പണം കൈമാറിയത് വിദേശത്ത് വച്ചാണെന്നും എന്‍ഫോഴ്‌സ് ഡയറക്ടറേറ്റ് കണ്ടെത്തിയതായി സൂചനയുണ്ട്. ഭൂമിവാങ്ങിക്കൂട്ടാന്‍ വന്‍തോതില്‍ കള്ളപ്പണ ഇടപാടുകള്‍ നടത്തിയെന്നതും ഇന്‍കംടാക്‌സും എന്‍ഫോഴ്‌സ്‌മെന്റും അന്വേഷിക്കുന്നുണ്ട്.
