ട്രെയിനിൽ നിന്നും ചാടി രക്ഷപ്പെട്ട പോക്‌സോ കേസ് പ്രതിയെ അസമിലെത്തി പിടികൂടി കേരള പൊലീസ്. അസം സ്വദേശി നസിദുൽ ഷെയ്ഖാണ് അറസ്റ്റിലായത്. കോഴിക്കോട് നല്ലളം പൊലീസാണ് അസമിൽ നിന്ന് പ്രതിയെ പിടികൂടിയത്. കഴിഞ്ഞ നവംബർ ഏഴിന് കോഴിക്കോട്ടേക്ക് കൊണ്ടുവരുന്നതിനിടെ ബിഹാർ അതിർത്തിയിൽ വെച്ചാണ് ട്രെയിനിൽ നിന്നും പ്രതി ചാടി രക്ഷപ്പെട്ടത്.
നല്ലളം പൊലീസ് പ്രതിയെ പിടികൂടി അസമിൽ നിന്ന് ട്രെയിൻ മാർഗം കേരളത്തിലേക്ക് കൊണ്ട് വരികയായിരുന്നു. രക്ഷപെട്ട പ്രതി അസമിൽ തന്നെയുണ്ടെന്നറിഞ്ഞ പൊലീസ് കഴിഞ്ഞമാസം 24ാം തീയതി അവിടേക്ക് തിരിച്ചു. അസം പൊലീസിന്റെ സഹായത്തോടെ പിടികൂടുകയായിരുന്നു.
Read more
ബംഗാൾ സ്വദേശിനിയായ പതിമൂന്ന് വയസുകാരിയെ 25,000 രൂപയ്ക്ക് ഹരിയാന സ്വദേശിക്ക് വിറ്റെന്നാണ് ഇയാൾക്കെതിരെയുള്ള കേസ്. വില്പനയ്ക്ക് ഇടനിലക്കാരനായി നിന്ന പ്രതിയുടെ പിതാവായ കേസിലെ രണ്ടാം പ്രതി ഒളിവിലാണ്. പെൺകുട്ടിയെ പണം കൊടുത്ത് വാങ്ങി വിവാഹം കഴിച്ച് പീഡിപ്പിച്ച് ഗർഭിണിയാക്കിയ മൂന്നാം പ്രതിയായ ഹരിയാന സ്വദേശി നേരത്തെ അറസ്റ്റിലായിരുന്നു.
