ശ്രീലങ്കയ്‌ക്ക് എതിരായ ആദ്യ ടി20: സഞ്ജുവിന് പുതിയ റോള്‍, ഇന്ത്യന്‍ പ്ലെയിംഗ് ഇലവന്‍

ഇന്ത്യ-ശ്രീലങ്ക മൂന്ന് മത്സര ടി20 പരമ്പരയിലെ ആദ്യ മത്സരം ഇന്ന് നടക്കും. മുംബൈയിലെ വാംഖഡെ സ്റ്റേഡിയത്തില്‍ വൈകീട്ട് 7 മണിക്കാണ് മത്സരം. ഹാര്‍ദ്ദിക് പാണ്ഡ്യയെ നായകനാക്കി യുവനിരടെ അണിനിരത്തിയാണ് ഇന്ത്യ ഇറങ്ങുന്നത്. ഇപ്പോഴിതാ ആദ്യ മത്സരത്തിനുള്ള ഇന്ത്യയുടെ പ്ലെയിംഗ് ഇലവന്‍ തിരഞ്ഞെടുത്തിരിക്കുകയാണ് ഇന്ത്യന്‍ മുന്‍ ഓപ്പണറായ വസിം ജാഫര്‍.

ഇഷാന്‍ കിഷനൊപ്പം ഓപ്പണറായി ഋതുരാജ് ഗെയ്ക്‌വാദിനെയാണ് ജാഫര്‍ തിരഞ്ഞെടുത്തിരിക്കുന്നത്. മൂന്നാം നമ്പരില്‍ സൂര്യകുമാര്‍ യാദവിനെ ഉള്‍പ്പെടുത്തി. നിലവില്‍ ഇന്ത്യയുടെ നാലാം നമ്പര്‍ ബാറ്റ്സ്മാനാണ് സൂര്യകുമാര്‍ കളിക്കുന്നത്. ആ പൊസിഷനിലേക്ക് സഞ്ജു സാംസണിനെയാണ് ജാഫര്‍ തിരഞ്ഞെടുത്തിരിക്കുന്നത്. നിലവില്‍ ഫിനീഷര്‍ റോളിലാണ് ഇന്ത്യയെ സഞ്ജു പരിഗണിച്ചുവരുന്നത്.

അഞ്ചാം നമ്പറില്‍ ഹാര്‍ദിക് പാണ്ഡ്യയെയാണ് ജാഫര്‍ നിയോഗിച്ചിരിക്കുന്നത്. ആറാം നമ്പര്‍ ഫിനീഷന്‍ റോളില്‍ ദീപക് ഹൂഡ, പിന്നാലെ അക്‌സര്‍ പട്ടേല്‍, വാഷിംഗ്ടണ്‍ സുന്ദര്‍ എന്നിവരെയാണ് ജാഫര്‍ പരിഗണിച്ചിരിക്കുന്നത്.

അര്‍ഷ്ദീപ് സിംഗ്, ഹര്‍ഷല്‍ പട്ടേല്‍ എന്നിവരാണ് ജാഫറിന്റെ ടീമിലെ പേസര്‍മാര്‍. യുസ്‌വേന്ദ്ര ചഹലാണ് ടീമിലെ സ്‌പെഷ്യലിസ്റ്റ് സ്പിന്നര്‍.