ബംഗ്ലാദേശ് പൗരന്മാരെന്ന് സംശയിക്കുന്നവരെ മനുഷ്യത്വവിരുദ്ധമായ രീതിയില്‍ പുറത്താക്കരുതെന്ന് സിപിഎം പൊളിറ്റ്ബ്യൂറോ. രാജ്യത്ത് നിയമവിരുദ്ധമായി കടന്നവരെ വ്യവസ്ഥാപിത നടപടിക്രമങ്ങളുടെ അടിസ്ഥാനത്തില്‍ കൈകാര്യം ചെയ്യണം. ബംഗാളി സംസാരിക്കുന്ന മുസ്ലിങ്ങളെ, ബിജെപി നേതൃത്വത്തിലുള്ള കേന്ദ്ര സംസ്ഥാന സര്‍ക്കാരുകള്‍ പഹല്‍ഗാം ഭീകരാക്രമണത്തിനുശേഷം പരിശോധനയൊന്നും കൂടാതെ ബംഗ്ലാദേശിലേയ്ക്ക് തള്ളിവിടുകയാണ്. ഫോറിനേഴ്സ് ട്രിബ്യൂണലിന്റെ വിധിക്കെതിരെ അസം ഹൈക്കോടതിയിലും സുപ്രീംകോടതിയിലും അപ്പീല്‍ നല്‍കിയവരെ അടക്കം ബംഗ്ലാദേശിലേയ്ക്ക് ബലമായി അയക്കുന്നു. ഇത് അംഗീകരിക്കാനാവില്ല.
തീവ്ര വര്‍ഗീയ നയങ്ങള്‍ നടപ്പാക്കുന്ന അസം സര്‍ക്കാര്‍ ‘തദ്ദേശീയരെ’ സായുധരാക്കാനും തീരുമാനിച്ചു. ദൂരവ്യാപക പ്രത്യാഘാതം ഉണ്ടാക്കുന്ന അപകടകരമായ തീരുമാനമാണിത്. ക്രമസമാധാനം സംരക്ഷിക്കേണ്ടതും നുഴഞ്ഞുകയറ്റം തടയേണ്ടതും സര്‍ക്കാരിന്റെ ചുമതലയാണ്. തള്ളിപ്പുറത്താക്കുന്നതും വര്‍ഗീയമായി ആയുധമണിയിക്കുന്നതും പരിഹാരമാര്‍ഗങ്ങളല്ല.
Read more
അനധികൃതകുടിയേറ്റക്കാരെ കണ്ടെത്താന്‍ മതം മാനദണ്ഡമാക്കരുത്. നിയമവിരുദ്ധ മാര്‍ഗങ്ങളിലൂടെ രാജ്യത്ത് കടന്നവരെ ന്യായപൂര്‍വമായ വിചാരണയ്ക്ക് വിധേയരാക്കണം. ദുരുദ്ദേശ്യങ്ങളില്ലാതെ രാജ്യത്ത് എത്തിയ ദരിദ്രരും രേഖകള്‍ ഇല്ലാത്തവരുമായ കുടിയേറ്റക്കാരെ അന്തസ്സായി വിചാരണ ചെയ്യണമെന്നും സിപിഎം ആവശ്യപ്പെട്ടു.
