നിലത്ത് കിടന്നുറങ്ങി ധോണിയും സാക്ഷിയും, ആരുമറിയാത്ത ബുദ്ധിമുട്ടുകള്‍

ഐപിഎല്‍ മത്സരക്രമം കളിക്കാരിലുണ്ടാക്കുന്ന ബുദ്ധിമുട്ടുകള്‍ വ്യക്തമാക്കി ചെന്നൈ സൂപ്പര്‍ കിംഗ് നായകന്‍ മഹേന്ദ്ര സിംഗ് ധോണിയുടെ ഇന്‍സ്റ്റഗ്രാം പോസ്റ്റ്. ധോണിയും സാക്ഷിയും വിമാനത്താവളത്തിന്റെ തറയില്‍ കിടന്നുറങ്ങുന്ന ഫോട്ടോയാണ് മുന്‍ ഇന്ത്യന്‍ നായകന്‍ പോസ്റ്റ് ചെയ്തത്.

ചെപ്പോക്കില്‍ കൊല്‍ക്കത്ത നൈറ്റ് റൈഡേഴ്‌സിനെതിരെ നടന്ന മത്സരത്തിന് ശേഷം വിമാനത്താവളത്തിലെത്തിയതായിരുന്നു ധോണിയും ടീം അംഗങ്ങളും. ഭാര്യ സാക്ഷിയും ധോണിക്കൊപ്പമുണ്ടായിരുന്നു. അടുത്ത മത്സരമായ ജയ്പൂരിലേക്കുള്ള ഫ്‌ളൈറ്റ് പുലര്‍ച്ചെയായതിനാലാണ് കളി കഴിഞ്ഞ് സംഘം നേരെ വിമാനത്താവളത്തിലെത്തിയത്.

https://www.instagram.com/p/BwD9VVXFdJt/?utm_source=ig_embed

“ഐ.പി.എല്ലിലെ മത്സരക്രമവുമായി പൊരുത്തപ്പെട്ടു പോകുകയും നിങ്ങളുടെ വിമാനം രാവിലെ ആകുകയും ചെയ്താല്‍ സംഭവിക്കുന്നത് ഇതായിരിക്കും” എന്ന കുറിപ്പാണ് ചിത്രത്തോടൊപ്പം ധോണി പങ്കുവെച്ചത്. ഐ.പി.എല്ലിലെ മത്സരസമയം കളിക്കാരെ പ്രയാസപ്പെടുത്തുവെന്നാണ് ധോണി ചൂണ്ടിക്കാണിക്കുന്നത്.

രാത്രി എട്ടു മണിക്ക് തുടങ്ങുന്ന മത്സരവും ശേഷം സമ്മാനദാനചടങ്ങും അവസാനിക്കുമ്പോഴേക്കും അര്‍ദ്ധരാത്രി കഴിഞ്ഞിട്ടുണ്ടാകും. പിന്നീട് ടീം ബസ്സില്‍ ഹോട്ടലില്‍ നിന്ന് വിമാനത്താവളത്തിലെത്തുമ്പോഴേക്കും പുലര്‍ച്ചെയാകും. ഇതിനിടയില്‍ വിമാനത്തിന്റെ സമയം രാവിലെയാണെങ്കിലാണ് ഈ പൊല്ലാപ്പുകള്‍.