കോട്ടയം കോടിമത നാലുവരിപ്പാതയില്‍ കാറില്‍ എത്തിയ സ്ത്രീകള്‍ കെഎസ്ആര്‍ടിസി ബസിന്റെ ഹെഡ്‌ലൈറ്റ് അടിച്ച് തകര്‍ത്തതായി പരാതി. ബസ് ഓവര്‍ടേക്ക് ചെയ്യുമ്പോള്‍ കാറിന്റെ വശത്തെ കണ്ണാടിയില്‍ തട്ടിയിരുന്നു. ഇതേ തുടര്‍ന്ന് പിന്തുടര്‍ന്നെത്തിയ കാര്‍ യാത്രികരായ സ്ത്രീകളാണ് ബസിന്റെ ഹെഡ് ലൈറ്റ് അടിച്ച് തകര്‍ത്തത്.
തിരുവനന്തപുരത്ത് നിന്ന് മലപ്പുറത്തേക്ക് പോയ ബസിന് നേരെയാണ് ആക്രമണമുണ്ടായത്. ബസ് തടഞ്ഞുനിറുത്തിയ ശേഷം ഇവര്‍ കെഎസ്ആര്‍ടിസി ജീവനക്കാരോട് തട്ടിക്കയറുകയായിരുന്നു. തുടര്‍ന്ന് കാറില്‍ നിന്നും ലിവറെടുത്ത് ബസിന്റെ ഹെഡ് ലൈറ്റുകള്‍ അടിച്ച് തകര്‍ക്കുകയായിരുന്നു. ആക്രമണത്തിന് ശേഷം സ്ത്രീകള്‍ അതേ കാറില്‍ തന്നെ രക്ഷപ്പെടുകയായിരുന്നു.
Read more
സ്ത്രീകള്‍ എത്തിയത് ആലപ്പുഴ രജിസ്‌ട്രേഷനിലുള്ള കാറിലായിരുന്നു. ചിങ്ങവനം പൊലീസ് സ്ഥലത്തെത്തി ബസ് സ്റ്റേഷനിലേക്ക് മാറ്റിയിട്ടുണ്ട്. കാറിന്റെ നമ്പര്‍ ഉള്‍പ്പെടെയുള്ള ചിത്രങ്ങള്‍ കെഎസ്ആര്‍ടിസി ജീവനക്കാര്‍ പൊലീസിന് കൈമാറിയിട്ടുണ്ട്.
