പെരിയ ഇരട്ട കൊലക്കേസ് പ്രതിയുടെ മകന്റെ വിവാഹത്തില്‍ പങ്കെടുത്ത സംഭവത്തില്‍ നേതൃത്വത്തിനെതിരെ കടുത്ത ആരോപണങ്ങളുമായി മുന്‍ പെരിയ കോണ്‍ഗ്രസ് മണ്ഡലം പ്രസിഡന്റ് പ്രമോദ് പെരിയ. താന്‍ മാത്രമല്ല സമുന്നതരായ ജില്ലാ-സംസ്ഥാന നേതാക്കളും വിവാഹത്തില്‍ പങ്കെടുത്തിരുന്നതായി പ്രമോദ് പെരിയ പറഞ്ഞു.
സംഭവത്തില്‍ തനിക്കെതിരെ മാത്രം നടപടിയെടുത്തത് പാര്‍ട്ടിക്കുള്ളില്‍ തനിക്കെതിരെയുണ്ടായ ഗൂഢാലോചനയുടെ ഫലമാണ്. കെപിസിസി സെക്രട്ടറി ബാലകൃഷ്ണന്‍ പെരിയ, ഉദുമ മണ്ഡലം യുഡിഎഫ് ചെയര്‍മാന്‍ രാജന്‍ പെരിയ എന്നിവരുള്‍പ്പെടെ വിവാഹത്തില്‍ പങ്കെടുത്തിരുന്നതായും പ്രമോദ് പെരിയ ആരോപിച്ചു.
Read more
പെരിയ കമ്മ്യൂണിറ്റി ഹെല്‍ത്ത് സെന്ററിലെ ഡോക്ടറാണ് വരന്‍. ഡോക്ടര്‍ നേരിട്ട് ക്ഷണിച്ചതിനാല്‍ പൊതുപ്രവര്‍ത്തകനെന്ന നിലയിലാണ് ചടങ്ങില്‍ പങ്കെടുത്തത്. വിവാഹം നടന്നത് ഉദുമ മണ്ഡലം യുഡിഎഫ് ചെയര്‍മാന്‍ രാജന്‍ പെരിയയുടെ ഉടമസ്ഥതയിലുള്ള ഓഡിറ്റോറിയത്തിലായിരുന്നു. എന്നാല്‍ നടപടി തനിക്കെതിരെ മാത്രമായിരുന്നു. തന്നെ അപകീര്‍ത്തിപ്പെടുത്താനാണ് ഫോട്ടോ സഹിതം സാമൂഹ്യമാധ്യമങ്ങളില്‍ പ്രചരിപ്പിച്ചതെന്നും പ്രമോദ് പറഞ്ഞു.
