മ്യൂക്കർ മൈക്കോസിസ് അഥവാ ബ്ലാക്ക് ഫംഗസ്; രോഗനിർണ്ണയം, ചികിത്സ, ലക്ഷണങ്ങൾ

 

മ്യൂക്കർ മൈക്കോസിസ് (ബ്ലാക്ക് ഫംഗസ്)

വിവിധതരം ഫംഗസുകൾ അഥവാ പൂപ്പലുകൾ നമ്മുടെ ചുറ്റിലുമുണ്ട്. അതിൻ്റെ കണികകൾ വായുവിലുണ്ട്. സാധാരണയായി പൂപ്പലുകൾ തൊലിപ്പുറത്ത് നിറവ്യത്യാസം, പാടുകൾ, ചൊറിച്ചിൽ അപൂർവ്വമായി ചുണ്ടിലും വായിലും നിറവ്യത്യാസം എന്നിവ ഉണ്ടാക്കും. തൊലിപ്പുറത്ത് ഉപയോഗിക്കാവുന്ന മരുന്നുകളും അപൂർവ്വമായി ഉള്ളിൽ കഴിക്കുന്ന മരുന്നുകളും ഉപയോഗിച്ച് രോഗം ഭേദമാകും. മ്യൂക്കർ മൈക്കോസിസ് അഥവാ ബ്ലാക്ക് ഫംഗസ് നമുക്ക് ചുറ്റുമുള്ള ഒരു ഫoഗസാണ്.

രോഗപ്രതിരോധശേഷി കുറഞ്ഞ അവസ്ഥകൾ ഏതൊക്കെയാണ്?

നിയന്ത്രിതമല്ലാത്ത പ്രമേഹം, ക്യാൻസർ, കീമോതെറാപ്പി ചികിത്സ, ദീർഘകാലമായി കൂടിയ അളവിൽ സ്റ്റീറോയ്ഡുകളുടെ ഉപയോഗം, ജന്മനാ പ്രതിരോധശേഷി ഇല്ലാതിരിക്കുക, എയ്ഡ്സ് എന്നീ അവസ്ഥകളിൽ രോഗപ്രതിരോധ ശേഷി കുറവായിരിക്കും. കോവിഡിൽ ഉപയോഗിക്കുന്ന മരുന്നുകൾ രോഗ പ്രതിരോധ ശേഷി കുറയ്ക്കും. ഏറെ നാൾ വെൻ്റിലേറ്ററിൽ കഴിയേണ്ടി വരുന്നവരിലും ഫംഗസ് ബാധയുണ്ടാകാൻ കൂടുതൽ സാധ്യതയുണ്ട്.

രോഗനിർണ്ണയം

സ്രവ പരിശോധനയോ ബയോപ്സി പരിശോധനയോ നടത്തി ഫംഗസിനെ കണ്ടെത്തുന്നു. രോഗബാധയുടെ തീവ്രത അറിയുവാൻ സ്കാനിംഗ് നടത്തുന്നു.

ചികിത്സ

ശക്തി കൂടിയ, ദീർഘനാൾ ഉള്ളിൽ കഴിക്കേണ്ട ആൻറിഫംഗൽ മരുന്നുകൾ കഴിക്കേണ്ടി വരും. രോഗബാധ മൂലം നശിച്ച് പോയ കോശങ്ങൾ നീക്കം ചെയ്യാനായി ശസ്ത്രക്രിയ ആവശ്യമായി വന്നേക്കാം.

 ലക്ഷണങ്ങൾ

കോവിഡിനെ തുടർന്ന് രോഗബാധ ഉണ്ടാകുമ്പോൾ മുഖത്ത് തലയോട്ടിയിലെ മൂക്കിൻ്റെ അടുത്തുള്ള സൈനസുകൾ (അറകൾ), കണ്ണ്, തലച്ചോറ് ഇവയെ ക്രമാനുഗതമായി ബാധിക്കുന്നു. നീണ്ടുനിൽക്കുന്ന കടുത്ത തലവേദന, മുഖം വേദന, മൂക്കിൽ നിന്ന് സ്രവം/രക്തസ്രാവം, മുഖത്ത് നീര് വന്ന് വീർക്കുക, മൂക്കിൻ്റെ പാലത്തിലും അണ്ണാക്കിലും കറുപ്പ് കലർന്ന നിറവ്യത്യാസം, കണ്ണുകൾ തള്ളി വരുക, കാഴ്ച മങ്ങൽ, കാഴ്ചനഷ്ടം, ഇരട്ടയായി കാണുക, തലച്ചോറിനെ ബാധിച്ചാൽ ബോധക്ഷയം, അപസ്മാരം തുടങ്ങിയവ ഉണ്ടാകാം.

പ്രതിരോധിക്കാം

ബ്ലാക്ക് ഫംഗസ് ഒരാളിൽ നിന്നും മറ്റൊരാളിലേക്ക് പകരില്ല. പ്രമേഹം നിയന്ത്രിച്ച് നിർത്തുക. രോഗലക്ഷണങ്ങൾ അവഗണിക്കരുത്. യഥാസമയം ചികിത്സ തേടുക.

 

വിവരങ്ങൾക്ക് കടപ്പാട്: കേരള സർക്കാർ