കെ.കെ രമയ്ക്കും ആനി രാജയ്ക്കുമെതിരായ മുന്‍ മന്ത്രി എം.എം മണിയുടെ വിവാദ പരാമര്‍ശത്തെ ന്യായീകരിച്ച് സാംസ്‌കാരിക മന്ത്രി വി.എന്‍. വാസവന്‍. മണി സഭ്യമല്ലാത്ത ഒന്നും പറഞ്ഞിട്ടില്ല. വിധവയെന്ന് പറഞ്ഞത് നാടന്‍ പ്രയോഗമെന്ന നിലയിലാണെന്നും വാസവന്‍ മാധ്യമങ്ങളോട് പറഞ്ഞു.
അതേസമയം, എംഎം മണി അധിക്ഷേപ പരാമര്‍ശങ്ങള്‍ നടത്തുന്നത് മുഖ്യമന്ത്രി പിണറായി വിജയന്റെ അനുമതിയോടെയാണെന്ന് പ്രതിപക്ഷ നേതാവ് വി ഡി സതീശന്‍. മുഖ്യമന്ത്രി നടത്തുന്നത് എം എം മണിക്ക് കുട പിടിക്കുന്ന നടപടിയാണ്. വിധവയാകുന്നത് വിധിയാണ് എന്ന് സിപിഎം നേതൃത്വം പറയുന്നുണ്ടോയെന്നും അദ്ദേഹം ചോദിച്ചു.
വിധവ എന്ന വാക്ക് പോലും ഇന്നത്തെ കാലഘട്ടത്തില്‍ ഉപയോഗിക്കാന്‍ പാടില്ല. ഇത്തരം പിന്തിരിപ്പന്‍ ആശയങ്ങളും പേറി നടക്കുന്നവരാണോ സിപിഎമ്മെന്നും പ്രതിപക്ഷ നേതാവ് മാധ്യമങ്ങളോട് ചോദിച്ചു. പിണറായി വിജയന് ടി പി ചന്ദ്രശേഖരനെ കൊന്നിട്ടും തീരാത്ത പകയാണ്. യു ഡി എഫ് നാലു ചുറ്റും കാവല്‍ നിന്ന് കെ കെ രമയെ സംരക്ഷിക്കും. ഇത്തരം ആരോപണങ്ങള്‍ സ്വര്‍ണക്കടത്ത് കേസില്‍ നിന്ന് ശ്രദ്ധ തിരിക്കാനുള്ള ശ്രമമാണോ എന്ന് സംശയിക്കുന്നവരും ഉണ്ടെന്നും അദ്ദേഹം പറഞ്ഞു.
Read more
സിപിഎമ്മും ബിജെപിയും തമ്മിലുള്ള തര്‍ക്കത്തെയും വി ഡി സതീശന്‍ പരിഹസിച്ചു. തര്‍ക്കം നാഷണല്‍ ഹൈവേയിലാണോ പൊതുമരാമത്ത് റോഡിലാണോ എന്നായിരുന്നു പരിഹാസം. സ്വര്‍ണക്കടത്ത് കേസില്‍ നിന്ന് ശ്രദ്ധ തിരിക്കാനായി എ കെ ജി സെന്ററിലേക്ക് ഓലപ്പടക്കം എറിഞ്ഞു. രാഹുല്‍ ഗാന്ധിയുടെ ഓഫിസ് തകര്‍ത്തുവെന്നും സതീശന്‍ പറഞ്ഞു.
