മോഹന്‍ലാലിന്റെ മകനായി പ്രണവ് മോഹന്‍ലാലിനെ തീരുമാനിച്ചു, പക്ഷേ; ആ സിനിമയെക്കുറിച്ച് സംവിധായകന്‍

സിബി മലയില്‍ ഒരുക്കിയ ക്ലാസിക് ചിത്രങ്ങളില്‍ ഒന്നായിരുന്നു ദശരഥം. ഈ സിനിമയിലെ രാജീവ് മേനോന്‍ എന്നകഥാപാത്രം മോഹന്‍ലാലിന്റെ കരിയറിലെ തന്നെ ഏറ്റവും മികച്ച വേഷങ്ങളില്‍ ഒന്നായാണ് ഇന്നും വിലയിരുത്തപ്പെടുന്നത്. ഇപ്പോഴിതാ വര്‍ഷങ്ങള്‍ക്ക് ശേഷം പ്ലാന്‍ ചെയ്ത അതിന്റെ രണ്ടാം ഭാഗത്തെ കുറിച്ച് കൂടുതല്‍ വെളിപ്പെടുത്തുകയാണ് സിബി മലയില്‍.

ഹേമന്ത് കുമാര്‍ രചിച്ചെങ്കിലും ഈ രണ്ടാം ഭാഗം ഇനി നടക്കില്ലെന്നാണ് സംവിധായകന്‍ പറയുന്നത്. മോഹന്‍ലാല്‍ താല്പര്യം പ്രകടിപ്പിച്ചില്ലെന്നും ഇതില്‍ ഒരു പ്രധാന കഥാപാത്രം ചെയ്യേണ്ട നെടുമുടി വേണു അന്തരിച്ചതുമാണ് ഇതിന് പിന്നിലെ കാരണം. ഇപ്പോഴിതാ പോപ്പര്‍ സ്റ്റോപ്പ് മലയാളം ചാനലിന് നല്‍കിയ അഭിമുഖത്തില്‍ മറ്റൊരു വെളിപ്പെടുത്തലും നടത്തിയിരിക്കുകയാണ് സിബി മലയില്‍.

ദശരഥം രണ്ടാം ഭാഗത്തില്‍ മോഹന്‍ലാല്‍ അവതരിപ്പിക്കുന്ന രാജീവ് മേനോന്‍ എന്ന കഥാപാത്രത്തിന്റെ മകന്‍ ആയി പ്ലാന്‍ ചെയ്തത് പ്രണവ് മോഹന്‍ലാലിനെ ആയിരുന്നു എന്നാണ് സിബി മലയില്‍ പറയുന്നത്. ദശരഥം രണ്ടിന്റെ തിരക്കഥ പുസ്തക രൂപത്തില്‍ പുറത്തിറക്കാനുള്ള പ്ലാനിലാണ് താനെന്നും അദ്ദേഹം വെളിപ്പെടുത്തി.

മോഹന്‍ലാല്‍ കൂടാതെ രേഖ, മുരളി, നെടുമുടി വേണു, സുകുമാരി, കരമന ജനാര്‍ദ്ദനന്‍ നായര്‍, സുകുമാരന്‍, ജയഭാരതി, കവിയൂര്‍ പൊന്നമ്മ, കെ പി എ സി ലളിത എന്നിവരും ദശരഥത്തിന്റെ ഭാഗമായിരുന്നു.