നടി മാല പാര്വതി അന്തരിച്ചതായി വ്യാജ വാര്ത്ത. ചില മാധ്യമങ്ങളില് വന്ന വ്യാജ വാര്ത്തകള്ക്കെതിരെ പ്രതികരണവുമായി രംഗത്തെത്തിയിരിക്കുകയാണ് മാല പാര്വതി. ഈ വാര്ത്ത കാരണം തനിക്ക് രണ്ട് പരസ്യത്തിന്റെ ഓഡിഷന് നഷ്ടമായെന്നും മാല പാര്വതി ഫെയ്സ്ബുക്കില് കുറിച്ചു.
”മാലപാര്വതിയുടെ മരണത്തിന് കാരണം ഭര്ത്താവും കുടുംബവുമാണോ, എന്താണ് അവര്ക്ക് സംഭവിച്ചത്?”, ”ആര്ഐപി മാല പാര്വതിയുടെ മരണത്തിന് കാരണം ഇതാണ്”, ”പാര്വതി ടി. മരണം ഫാക്ട് ചെക്ക്” എന്നിങ്ങനെയുള്ള വാര്ത്തളുടെ സ്ക്രീന് ഷോട്ട് പങ്കുവച്ചാണ് നടിയുടെ പ്രതികരണം.
”ഹൈദരാബാദില് നിന്നുള്ള ഒരു കാസ്റ്റിംഗ് ഏജന്റാണ് ഇത് എനിക്ക് അയച്ചു തന്നത്. ഇത്തരം റിപ്പോര്ട്ടുകള് കാരണം അവര് ആശയക്കുഴപ്പത്തിലായി. ഇത് ഗുരുതരമാണ്. ഞാന് മരിച്ചുവെന്ന് അവര് കരുതിയതിനാല് എനിക്ക് വര്ക്കാണ് നഷ്ടപ്പെട്ടത്.”
”മരിച്ചിട്ടില്ല എന്ന് പറയേണ്ടി വരുന്നത് ഒരു ഗതികേടാണോ തമാശയാണോന്നറിയില്ല. പക്ഷേ, വര്ക്ക് നഷ്ടപ്പെടാന് ഇടയാക്കുന്നത് വയറ്റത്തടിക്കുന്നതിന് തുല്യമാ. വാട്ട്സ്ആപ്പില് പ്രൊഫൈല് പിക് മാറിയത് കൊണ്ടാണ്, ഈ കാസ്റ്റിംഗ് ചെയ്യുന്ന പെണ്കുട്ടി എന്നെ വിളിച്ചത്. രണ്ട് പരസ്യത്തിന്റെ ഓഡിഷന് മിസ്സായി!” എന്നാണ് മാല പാര്വതി പറയുന്നത്.
വിഷ്ണു വിശാല് നായകനായ തമിഴ് ചിത്രം എഫ്ഐആര് ആണ് മാല പാര്വതിയുടെതായി അടുത്തിടെ റിലീസ് ചെയ്തത്. ചിത്രത്തില് പര്വീണ ബീഗം എന്ന കഥാപാത്രത്തെയാണ് മാല പാര്വതി അവതരിപ്പിച്ചത്. ഭീഷ്മ പര്വമാണ് നടിയുടെതായി റിലീസിന് ഒരുങ്ങുന്ന ഏറ്റവും അപുതിയ ചിത്രം.