'ദൈവത്തിന് നന്ദി... ഒരു അച്ഛനെന്ന നിലയില്‍ എനിക്കേറെ ആശ്വാസം തോന്നുന്നു..'; ആര്യന്‍ ഖാന്റെ ജാമ്യം ആഘോഷിച്ച് ബോളിവുഡ്

ലഹരിമരുന്ന് കേസില്‍ ആര്യന്‍ ഖാന് ജാമ്യം ലഭിച്ചത് ആഘോഷമാക്കി ബോളിവുഡ്. സോനു സൂദ്, സ്വര ഭാസ്‌കര്‍, ആര്‍ മാധവന്‍, രാം ഗോപാല്‍ വര്‍മ, രണ്‍വീര്‍ ഷൂരി, മലൈക അറോറ, ഷനായ കപൂര്‍, സുചിത്ര കൃഷ്ണമൂര്‍ത്തി, ഹന്‍സല്‍ മെഹ്ത, സഞ്ജയ് ഗുപ്ത തുടങ്ങിയ സെലിബ്രിറ്റികള്‍ ആര്യന്റെ ജാമ്യത്തില്‍ സന്തോഷം പങ്കുവെച്ചു.

”ദൈവത്തിന് നന്ദി… ഒരു അച്ഛനെന്ന നിലയില്‍ എനിക്കേറെ ആശ്വാസം തോന്നുന്നു.. പോസ്റ്റീവായ, നല്ല കാര്യങ്ങള്‍ സംഭവിക്കട്ടെ…” എന്നാണ് മാധവന്‍ ട്വീറ്റ് ചെയ്തത്. ആര്യനൊപ്പമുള്ള കുട്ടിക്കാല ചിത്രമാണ് ഷനായ കപൂര്‍ പങ്കുവെച്ചത്. ”എനിക്കിന്ന് രാത്രി ആഘോഷമാക്കണം..” എന്നാണ് സംവിധായകന്‍ ഹന്‍സാല്‍ മെഹ്ത ട്വീറ്റ് ചെയ്തത്.

”ആര്യന് ജാമ്യം ലഭിച്ചതില്‍ അതിയായ സന്തോഷമുണ്ട്, എന്നാല്‍ ഒരിക്കലും ചെയ്യാത്ത കാര്യത്തിന് ഒരു യുവാവിനെ 25 ദിവസത്തിലധികം ജയിലില്‍ കിടത്തിയ സംവിധാനത്തില്‍ ഞാന്‍ വളരെ അസ്വസ്ഥനാണ്” എന്നാണ് സഞ്ജയ് ഗുപ്തയുടെ ട്വീറ്റില്‍ പറയുന്നത്.

ബോംബെ ഹൈക്കോടതിയാണ് ആര്യന് ജാമ്യം അനുവദിച്ചത്. ആര്യന്‍ ഖാനൊപ്പം ആഡംബര കപ്പലില്‍ നിന്ന് അറസ്റ്റ് ചെയ്ത അര്‍ബാസ് മര്‍ച്ചന്റ്, മോഡല്‍ മുന്‍മുണ്‍ ധമേച്ച എന്നിവര്‍ക്കും ജാമ്യം അനുവദിച്ചിട്ടുണ്ട്. ആര്‍തര്‍ റോഡ് ജയിലില്‍ കഴിയുന്ന ആര്യന്‍ ഖാന്‍ ജാമ്യനടപടികള്‍ പൂര്‍ത്തിയാക്കി ഇന്ന് പുറത്തിറങ്ങി.

aRYAN