കത്തിച്ചാമ്പലായി കൊണ്ടിരിക്കുന്ന ആമസോണ്‍ മഴക്കാടുകളുടെ വാര്‍ത്ത, കാടിനെ സ്‌നേഹിക്കുന്നവരുടെ പ്രതീക്ഷ കെടുത്തുന്നതാണ്. കൃഷി ആവശ്യങ്ങള്‍ക്കായി മനുഷ്യര്‍ തന്നെയാണ് അവിടെ വനത്തിനു തീയിടുന്നതെന്നാണ് റിപ്പോര്‍ട്ടുകള്‍. എന്നാല്‍ ഇല്ലാതായ പച്ചപ്പ് വീണ്ടെടുത്ത കഥയാണ് മണിപ്പൂര്‍ സ്വദേശി മോയിറാങ്ഥെം ലോയിയ. തീയിട്ടു നശിപ്പിച്ച വനം പുനരുജ്ജീവിപ്പിച്ചിരിക്കുകയാണ് ഈ 45-കാരന്‍.
മണിപ്പൂര്‍ സ്വദേശിയായ മോയിറാങ്ഥെം ലോയിയ ആണ് ഇംഫാലില്‍ 300 ഏക്കര്‍ വനം വീണ്ടെടുത്തത് അമ്പരപ്പിച്ചിരിക്കുന്നത്. ഒരു മെഡിക്കല്‍ റെപ്രസന്റേറ്റീവ് ആയിരുന്ന ലോയിയ, ആ ജോലി ഉപേക്ഷിച്ചാണ് വനസംരക്ഷണപ്രവര്‍ത്തനങ്ങളില്‍ ഏര്‍പ്പെട്ടത്. 2002- മുതലാണ് നെല്‍കൃഷിക്കായി തീയിട്ടു നശിപ്പിച്ച പുന്‍ഷിലോക് വനത്തെ പുനരുജ്ജീവിപ്പിക്കാനുള്ള ശ്രമങ്ങള്‍ ലോയിയ ആരംഭിക്കുന്നത്. പേരിനു പോലും ഒരു മരമില്ലാതിരുന്ന ആ പ്രദേശത്ത് 17 വര്‍ഷത്തെ പരിശ്രമം കൊണ്ട് അദ്ദേഹം പച്ചപ്പു നിറച്ചു.
ഇന്ന് 250 ഇനം സസ്യങ്ങളും 25 ഇനം മുളയും പുന്‍ഷിലോക് വനത്തിലുണ്ട്. പക്ഷികളും പാമ്പുകളും മറ്റു ജന്തുക്കളും ഇവിടെ യഥേഷ്ടം വിഹരിക്കുന്നു.
Read more
നിരവധി പേരാണ് ഇന്ന് ഈ കാടിനെ അടുത്തറിയാനും അനുഭവിക്കാനുമായി എത്തുന്നത്. തന്റെ പ്രയത്‌നങ്ങള്‍ മറ്റുള്ളവര്‍ക്ക് ഒരു പ്രചോദനമാകണമെന്നാണ് ലോയിയയുടെ ആഗ്രഹം. അതിനായി കാടിന്റെ പ്രാധാന്യത്തെ കുറിച്ചും ആരോഗ്യകരമായ ഒരു ആവാസവ്യവസ്ഥയുടെ ആവശ്യകതയെ കുറിച്ചും ബോധവത്കരണം നടത്തുകയാണ് ലോയിയ.
