ഫുട്‌ബോള്‍ ആരാധകരുടെ ആകാംക്ഷയ്ക്ക് വിരാമമിട്ട് അര്‍ജന്റൈന്‍ സൂപ്പര്‍ താരം ലയണല്‍ മെസിയെ ഫ്രഞ്ച് ക്ലബ്ബ് പിഎസ്ജി ആരാധകര്‍ക്കു മുന്നില്‍ അവതരിപ്പിച്ചു. പിഎസ്ജിയിലെ ആദ്യ വാര്‍ത്ത സമ്മേളനത്തില്‍ പങ്കെടുത്ത മെസി ക്ലബ്ബിന്റെ ജഴ്‌സി അണിഞ്ഞ് ഫോട്ടോയ്ക്ക് പോസ് ചെയ്തു. 30-ാം നമ്പര്‍ ജഴ്‌സിയാണ് മെസി പിഎസ്ജിയില്‍ ധരിക്കുക.
പാരിസില്‍ എത്താനായതില്‍ സന്തോഷമുണ്ടെന്ന് പറഞ്ഞ മെസി ക്ലബ്ബിനൊപ്പം ചാമ്പ്യന്‍സ് ലീഗ് ജയിക്കാനാവുമെന്നും ആത്മവിശ്വാസം പ്രകടിപ്പിച്ചു. ലീഗ് വണ്ണിനെ ഞാന്‍ എപ്പോഴും വീക്ഷിച്ചിരുന്നു. പാരിസില്‍ എനിക്ക് സുഹൃത്തുക്കളുണ്ട്. മത്സരാധിക്യമുള്ള ലീഗാണിത്. എല്ലാവര്‍ക്കും പാരിസിനെ തോല്‍പ്പിക്കണം. ഇവിടെയെത്തിയതില്‍ സന്തോഷം- മെസി പറഞ്ഞു. എനിക്ക് നെയ്മറെ നന്നായി അറിയാം. ഞാന്‍ ഇവിടെ വരാന്‍ നെയ്മറാണ് കാരണം. അതുകൊണ്ട് പിഎസ്ജിയിലെ മറ്റ് താരങ്ങളെയും എനിക്കറിയാം. നമ്മള്‍ ഇതിനു മുന്‍പും പല തവണ കണ്ടിട്ടുണ്ട്, ഇതു സംബന്ധിച്ച ഒരു ചോദ്യത്തിന് മറുപടിയായി മെസി പറഞ്ഞു.
Read more
എംബാപെ പാരിസിന്റെ കുട്ടിയാണ്. പാരിസിനുവേണ്ടി അദ്ദേഹം കളിക്കുന്നു. മത്സരവീര്യവും വിജയതൃഷ്ണയുള്ള താരമാണ് എംബാപെയെന്നും മെസി കൂട്ടിച്ചേര്‍ത്തു.സ്പാനിഷ് ക്ലബ്ബ് ബാഴ്‌സലോണയുമായുള്ള രണ്ട് പതിറ്റാണ്ട് നീണ്ട ബന്ധം ദിവസങ്ങള്‍ക്ക് മുന്‍പാണ് മെസി അവസാനിപ്പിച്ചത്. സാമ്പത്തിക പ്രതിബന്ധങ്ങളാണ് മെസിയെ കൈവിടാന്‍
ബാഴ്‌സയെ പ്രേരിപ്പിച്ചത്. പിന്നാലെ മെസിയെ പിഎസ്ജി റാഞ്ചുകയുംചെയ്തു.
