ആര്‍സിബിക്കെതിരെ കത്തിക്കയറി വീണ്ടും ഫോമില്‍ തിരിച്ചെത്തി സണ്‍റൈസേഴ്‌സ് ഹൈദരാബാദിന്റെ ഇഷാന്‍ കിഷന്. ഇന്നത്തെ മത്സരത്തില്‍ കരുതലോടെ കളിച്ച താരം 48 പന്തില്‍ 94 റണ്‍സെടുത്ത് ടീമിന് കൂറ്റന്‍ സ്‌കോര്‍ സമ്മാനിച്ചു. ഏഴ് ഫോറും അഞ്ച് സിക്‌സും ഉള്‍പ്പെടെയാണ് ഇഷാന്‍ കിഷന്റെ ഇന്നിങ്‌സ്. ഈ സീസണില്‍ ഫോം ഔട്ടായതിന്റെ പേരില്‍ വലിയ രീതിയിലുളള വിമര്‍ശനമാണ് കിഷന് നേരിടേണ്ടി വന്നത്. സീസണിലെ ആദ്യ മത്സരത്തില്‍ സെഞ്ച്വറി നേടിയതൊഴിച്ചാല്‍ കാര്യമായ പ്രകടനങ്ങളൊന്നും താരത്തില്‍ നിന്നുണ്ടായിരുന്നില്ല.
ഇനിയും ഫോമായില്ലെങ്കില്‍ അടുത്ത സീസണില്‍ ടീംമാനേജ്‌മെന്റ് കൈവിടുമെന്ന അവസ്ഥ വരെ കിഷന് വന്നു. കാത്തിരിപ്പിനൊടുവില്‍ മികച്ച പ്രകടനം ടീമിന് വേണ്ടി നടത്താന്‍ താരത്തിന് ഇന്ന് സാധിച്ചു. ഇഷാന്‍ കിഷന്റെ അര്‍ധസെഞ്ച്വറി മികവില്‍ 20 ഓവറില്‍ 231 റണ്‍സ് എന്ന മികച്ച സ്‌കോര്‍ നേടാന്‍ ഹൈദരാബാദിനായി. അഭിഷേക് ശര്‍മ്മ(34), ക്ലാസന്‍(24), അനികേത് വെര്‍മ്മ(26) തുടങ്ങിയവരും ടീം സ്‌കോറിലേക്ക് കാര്യമായി സംഭാവന നല്‍കി.
Read more
അതേസമയം പോയിന്റ് ടേബിളില്‍ മുന്നിലെത്താനാവും ഇന്നത്തെ കളിയില്‍ ആര്‍സിബിയുടെ ശ്രമം. നിലവില്‍ രണ്ടാം സ്ഥാനത്താണ് ബെംഗളൂരു ഉളളത്. ആശ്വാസ ജയത്തിനായാണ് ഹൈദരാബാദിന്റെ ശ്രമം. പോയിന്റ് ടേബിളില്‍ എട്ടാം സ്ഥാനക്കാരാണ് അവര്‍. ഇന്ന് ലഖ്‌നൗ സൂപ്പര്‍ ജയന്റ്‌സിന്റെ ഹോംഗ്രൗണ്ടായ ഏകാന സ്‌റ്റേഡിയത്തില്‍ വച്ചാണ് മത്സരം.
