ഐപിഎല്‍ 2025 സീസണിലൂടെ അരങ്ങേറി ക്രിക്കറ്റ് പ്രേമികളെ ഒന്നടങ്കം ഞെട്ടിച്ച താരമാണ് വൈഭവ് സൂര്യവന്‍ഷി. 14കാരനായ കൗമാര താരം ഗുജറാത്ത് ടൈറ്റന്‍സിനെതിരെ നേടിയ അതിവേഗ സെഞ്ച്വറി ചരിത്രത്തില്‍ ഇടംപിടിച്ചിരുന്നു. കഴിഞ്ഞ ലേലത്തില്‍ 1.10കോടി മുടക്കിയാണ് രാജസ്ഥാന്‍ റോയല്‍സ് വൈഭവിനെ ടീമിലെടുത്തത്. ഇത്രയും ചെറിയ പ്രായത്തില്‍ എന്തിന് ടീമിലെടുത്തു എന്ന്‌ ചോദിച്ചവര്‍ക്ക് വായടപ്പിക്കുന്ന മറുപടിയാണ് തന്റെ സെഞ്ച്വറി പ്രകടനത്തിലൂടെ വൈഭവ് നല്‍കിയത്. ഒറ്റ ഇന്നിങ്‌സിലൂടെ മുന്‍താരങ്ങളെയും ക്രിക്കറ്റ് വിദഗ്ധരെയും ഉള്‍പ്പെടെ അതിശയപ്പെടുത്താന്‍ വൈഭവിന് സാധിച്ചു.
ഐപിഎലില്‍ തിളങ്ങിയ കൗമാര താരത്തിന് ഇനി അന്താരാഷ്ട്ര ക്രിക്കറ്റിലും ഒരവസരം നല്‍കണമെന്ന് പറയുകയാണ് വൈഭവിന്റെ കോച്ച് അശോക് കുമാര്‍. ബിഹാര്‍ അണ്ടര്‍ 19 ടീമില്‍ ഉള്‍പ്പെടെ വൈഭവിനെ അദ്ദേഹം പരിശീപ്പിച്ചിരുന്നു. “എന്റെ പ്രവചനം എന്താണെന്നുവച്ചാല്‍ ഫിറ്റ്‌നസിലും ഫീല്‍ഡിങിലും വൈഭവ് മെച്ചപ്പെടുകയാണെങ്കില്‍ രണ്ട് വര്‍ഷങ്ങള്‍ക്കുളളില്‍ അവന് ഇന്ത്യയുടെ ടി20 സീനിയര്‍ ടീമില്‍ എത്തും. ബിസിസിഐ ഒരവസരം അവന് എന്തായാലും നല്‍കുമെന്ന് ഞാന്‍ കരുതുന്നു. കാരണം രണ്ടോ നാലോ കളിക്കാര്‍ ഒഴികെ ടി20 ടീമിലെ ബാക്കിയുളളവരെല്ലാം പ്രധാനമായും 25 വയസോ അതില്‍ താഴെയോ പ്രായമുളളവരാണ്”, അശോക് കുമാര്‍ പറഞ്ഞു.
Read more
“ഗുജറാത്തിനെതിരെ 35 ബോളില്‍ സെഞ്ച്വറി നേടി ഒറ്റയ്ക്ക് മത്സരം ജയിപ്പിക്കുന്നതെല്ലാം കുട്ടിക്കാലം മുതലേ അവനില്‍ കാണുന്ന ആറ്റിറ്റിയൂഡാണ്‌. രാഹുല്‍ ദ്രാവിഡ് സാറും, വിക്രം റാത്തോഡ് സാറും ഉളളതിനാല്‍ വൈഭവിന്റെ ബാറ്റിങ് മെച്ചപ്പെട്ടു. വൈറ്റ് ബോള്‍ ഉപയോഗിച്ച് അവന് നടത്തിയ പരിശീലനം. മൂന്ന് മാസത്തിനുളളില്‍ അതില്‍ മെച്ചപ്പെടാന്‍ തുടങ്ങി. സാഹചര്യങ്ങള്‍ നന്നായി മനസിലാക്കാന്‍ വൈഭവ് പഠിച്ചു”, കോച്ച് കൂട്ടിച്ചേര്‍ത്തു.
