ഐപിഎല്‍ ആവേശം കഴിഞ്ഞതോടെ ഇന്ത്യന്‍ ടീമിന് ഇനി അന്താരാഷ്ട്ര ക്രിക്കറ്റിന്റെ സമയമാണ്. ഇംഗ്ലണ്ടിനെതിരായ അഞ്ച് ടെസ്റ്റുകള്‍ ഉള്‍പ്പെടുന്ന പരമ്പര ജൂണ്‍ 20നാണ് ആരംഭിക്കുന്നത്. ഇംഗ്ലണ്ട് സീരീസിനുളള ഇന്ത്യന്‍ ടീമിനെ ഐപിഎല്‍ സമയത്താണ് ബിസിസിഐ പ്രഖ്യാപിച്ചത്. വിരാട് കോഹ്ലിയും രോഹിത് ശര്‍മ്മയും കളം ഒഴിഞ്ഞതോടെ ഇനി യുവനിരയുടെ കാലമാണ്. ഇന്ത്യന്‍ ക്രിക്കറ്റിലെ പുതുയുഗത്തിനാണ് ഇംഗ്ലണ്ട് സീരിസോടെ തുടക്കമാവുക. ശുഭ്മാന്‍ ഗില്‍ ക്യാപ്റ്റനായ ടീമില്‍ കരുണ്‍ നായര്‍, സായി സുദര്‍ശന്‍, അഭിമന്യൂ ഈശ്വരന്‍ തുടങ്ങിയവരും തിരഞ്ഞെടുക്കപ്പെട്ടു.
ഏകദിന, ടി20യില്‍ തിളങ്ങിയ അര്‍ഷ്ദീപ് സിങിനും ആദ്യമായി ടെസ്റ്റ് ടീമില്‍ ഇടം ലഭിച്ചു. അതേസമയം ഇന്ത്യക്കെതിരായ ആദ്യ ടെസ്റ്റിനുളള ടീമിനെ പ്രഖ്യാപിച്ചിരിക്കുകയാണ്‌ ഇംഗ്ലണ്ട്. സ്റ്റാര്‍ ഓള്‍റൗണ്ടര്‍ ബെന്‍ സ്‌റ്റോക്‌സാണ് ടീമിന്റെ ക്യാപ്റ്റന്‍. ഇന്ത്യക്കെതിരെ അവസാനം നടന്ന പരമ്പരയിലും സ്റ്റോക്ക്‌സ് തന്നെയായിരുന്നു നായകന്‍. അന്ന് ആദ്യ ടെസ്റ്റില്‍ ഇംഗ്ലണ്ട് ജയിച്ചെങ്കിലും പിന്നീടുളള നാല് ടെസ്റ്റുകളിലും ജയിച്ച് ആതിഥേയരായ ഇന്ത്യ പരമ്പര സ്വന്തമാക്കുകയായിരുന്നു.
Read more
ഒരിടവേളയ്ക്ക് ശേഷം വൈറ്ററന്‍ ഓള്‍റൗണ്ടര്‍ ക്രിസ് വോക്‌സ് ഇംഗ്ലണ്ട് ടീമില്‍ വീണ്ടും ഇടംപിടിച്ചു. ജേക്കബ് ബെതല്‍, ബ്രൈഡന്‍ കാര്‍സെ, ജാമി ഒവര്‍ട്ടണ്‍ തുടങ്ങിയവര്‍ക്കും അവസരം ലഭിച്ചു. ഇംഗ്ലണ്ട് ടീം; ബെന്‍ സ്‌റ്റോക്‌സ് (സി), ഷോയിബ് ബഷീര്‍, ജേക്കബ് ബെഥേല്‍, ഹാരി ബ്രൂക്ക്, ബ്രൈഡണ്‍ കാര്‍സെ, സാം കുക്ക്, സാക്ക് ക്രാളി, ബെന്‍ ഡക്കറ്റ്, ജാമി ഓവര്‍ട്ടണ്‍, ഒല്ലി പോപ്പ്, ജോ റൂട്ട്, ജാമി സ്മിത്ത്, ജോഷ് ടോങ്, ക്രിസ് വോക്‌സ്.
