ശനി, ഞായർ ദിവസങ്ങളിൽ ലോക്ക് ഡൗണിൽ കൂടുതൽ നിയന്ത്രണങ്ങൾ; ഹോട്ടലുകളിൽ ഓൺലൈൻ ഡെലിവറി മാത്രം

 

സംസ്ഥാനത്ത് തുടരുന്ന ലോക്ക് ഡൗണിൽ പുതിയ മാർ​ഗനിർദേശങ്ങളുമായി സർക്കാർ. ശനി, ഞായർ ദിവസങ്ങളിലേക്കാണ് പുതിയ നിയന്ത്രണങ്ങളും ഇളവുകളും സർക്കാർ പ്രഖ്യാപിച്ചത്. ശനി, ഞായർ ദിവസങ്ങളിൽ ദിവസങ്ങളിൽ ഹോട്ടലുകളിൽ നിന്നും ഓൺലൈൻ ഡെലിവറി മാത്രമേ ഇനി അനുവ​ദിക്കൂ. പാഴ്സൽ, ടേക് എവേ എന്നിവ ഉണ്ടാകില്ല.‌

മൊബൈൽ ഫോൺ റിപ്പയറിംഗ് കടകൾ നാളെ തുറക്കാൻ അനുമതിയുണ്ട്. ശനിയാഴ്ചയും ഞായറാഴ്ചയും സാമൂഹിക അകലം പാലിച്ച് നിർമ്മാണ പ്രവർത്തനങ്ങൾ നടത്താനും തടസമില്ല. എന്നാൽ ഇക്കാര്യം പൊലീസ് സ്റ്റേഷനിൽ മുൻകൂട്ടി അറിയിക്കണം.

കേരളത്തിൽ നിലവിൽ ജൂൺ 16 വരെ ലോക്ക് ഡൗൺ നീട്ടിയിട്ടുണ്ട്. കഴിഞ്ഞ ഏതാനും ദിവസങ്ങളായി ടെസ്റ്റ് പൊസിറ്റിവിറ്റി നിരക്കും പുതിയ കോവിഡ് കേസുകളും കുറഞ്ഞുവരുന്നുണ്ട്. ഇന്ന് ടെസ്റ്റ് പോസിറ്റിവിറ്റി നിരക്ക് 13.45 ശതമാനമാണ്. ഈ നിരക്ക് പത്ത് ശതമാനത്തിനും താഴെ വന്നാൽ ലോക്ക് ഡൗൺ പിൻവലിക്കാൻ സാധിച്ചേക്കും എന്നാണ് ആരോ​ഗ്യ വിദ​ഗ്ദ്ധരുടെ വിലയിരുത്തൽ.