59 വര്‍ഷത്തിന് ശേഷം അനശ്വര ഗാനം പുനരാവിഷ്‌ക്കരിച്ച് റിമ കല്ലിങ്കലും സംഘവും; 'നീലവെളിച്ച'ത്തിലെ ഗാനം എത്തി

59 വര്‍ഷത്തിന് ശേഷം ‘അനുരാഗ മധുചഷകം’ എന്ന ഗാനം പുനരാവിഷ്‌ക്കരിച്ച് റിമ കല്ലിങ്കലും സംഘവും. വൈക്കം മുഹമ്മദ് ബഷീറിന്റെ ‘നീലവെളിച്ചം’ എന്ന പ്രശസ്ത കഥയെ ആസ്പദമാക്കി അതേ പേരില്‍ ആഷിഖ് അബു സംവിധാനം ചെയ്യുന്ന ചിത്രത്തിലെ ഗാനമാണ് പുറത്തു വന്നിരിക്കുന്നത്.

നീലവെളിച്ചം അടിസ്ഥാനമാക്കി എ വിന്‍സെന്റിന്റെ സംവിധാനത്തില്‍ 1964ല്‍ പുറത്തെത്തിയ ‘ഭാര്‍ഗവീനിലയം’ എന്ന ചിത്രത്തിലെ ഗാനമാണ് നീലവെളിച്ചത്തിന് വേണ്ടി പുനരാവിഷ്‌കരിച്ചിരിക്കുന്നത്. പി ഭാസ്‌കരന്റെ വരികള്‍ക്ക് എം.എസ് ബാബുരാജ് ഈണം പകര്‍ന്ന ഒറിജിനല്‍ ഗാനം പുനരാവിഷ്‌കരിച്ചിരിക്കുന്നത് ബിജിബാലും റെക്സ് വിജയനും ചേര്‍ന്നാണ്.

എസ് ജാനകി ആലപിച്ച ആദ്യ ഗാനത്തിന്റെ പുതിയ രൂപം കെ.എസ് ചിത്രയാണ് ആലപിച്ചിരിക്കുന്നത്. റിമ കല്ലിങ്കലിന്റെ പിറന്നാള്‍ ദിനത്തിലാണ് ഗാനം പുറത്തെത്തിയിരിക്കുന്നത്. ടൊവിനോ തോമസ്, റോഷന്‍ മാത്യു, ഷൈന്‍ ടോം ചാക്കോ എന്നിവരാണ് ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നത്.

ഭാര്‍ഗവീനിലയത്തില്‍ മധു, പ്രേംനസീര്‍, വിജയ നിര്‍മ്മല, പിജെ ആന്റണി എന്നിവര്‍ അവിസ്മരണീയമാക്കിയ കഥാപാത്രങ്ങളെയാണ് ടൊവിനോയും റോഷനും റിമയും ഷൈനും അവതരിപ്പിക്കുന്നത്. കുതിരവട്ടം പപ്പു ആദ്യമായി അഭിനയിച്ച ചിത്രം കൂടിയാണ് ഭാര്‍ഗവിനിലയം.

കുതിരവട്ടം പപ്പുവിന്റെ കഥാപാത്രത്തെ നീലവെളിച്ചത്തില്‍ രാജേഷ് മാധവനാണ് അവതരിപ്പിക്കുന്നത്. ഒപിഎം സിനിമാസിന്റെ ബാനറില്‍ ആഷിഖ് അബു, റിമ കല്ലിങ്കല്‍ എന്നിവരാണ് നീലവെളിച്ചം നിര്‍മ്മിക്കുന്നത്. ഋഷികേശ് ഭാസ്‌ക്കരനാണ് ചിത്രത്തിന്റെ തിരക്കഥ.