പുതിയ ചിത്രം ‘ഖുഷി’ ഹിറ്റ് ആയതോടെ തിരഞ്ഞെടുക്കുന്ന 100 കുടുംബങ്ങള്‍ക്ക് ഒരു ലക്ഷം രൂപ സഹായമായി നല്‍കാനൊരുങ്ങുകയാണ് വിജയ് ദേവരകൊണ്ട. ഖുഷിക്ക് ലഭിച്ച പ്രതിഫലത്തില്‍ നിന്നാണ് ഒരു കോടി രൂപ വിജയ് നല്‍കാനൊരുങ്ങുന്നത്. ഈ പശ്ചാത്തലത്തില്‍ വിജയ്‌യുടെ മറ്റൊരു ചിത്രത്തിന്റെ വിതരണക്കാരുടെ ആവശ്യമാണ് ശ്രദ്ധ നേടുന്നത്.
ബോക്‌സോഫീസില്‍ പരാജയമായി മാറിയ ‘വേള്‍ഡ് ഫെയ്മസ് ലവര്‍’ എന്ന സിനിമയുടെ വിതരണക്കാരാണ് നടനോട് അഭ്യര്‍ത്ഥനയുമായി രംഗത്തെത്തിയിരിക്കുന്നത്. സിനിമയില്‍ തങ്ങള്‍ക്ക് നഷ്ടപ്പെട്ട പണം കൂടി തിരിച്ചു തരണമെന്ന് വിതരണക്കാരായ അഭിഷേക് പിക്ചേഴ്സ് ട്വീറ്റ് ചെയ്തിരിക്കുന്നത്.
”പ്രിയപ്പെട്ട വിജയ് ദേവേരക്കൊണ്ട, വേള്‍ഡ് ഫെയ്മസ് ലവര്‍ എന്ന സിനിമയുടെ വിതരണവുമായി ബന്ധപ്പെട്ട് ഞങ്ങള്‍ക്ക് എട്ട് കോടി നഷ്ടമായി. ഇതുവരെ ആരും പ്രതികരിച്ചില്ല. ഹൃദയ വിശാലനായ താങ്കള്‍ ഒരു കോടി രൂപ സംഭാവന ചെയ്യുന്നതിനാല്‍ ഞങ്ങള്‍ വിതരണക്കാരുടയെും തിയേറ്ററുടമകളുടെയും കുടുംബങ്ങളെ കൂടി സഹായിക്കണം. നന്ദി, അഭിഷേക് പിക്ചേഴ്സ്” എന്നാണ് ട്വീറ്റ്.
അഭിഷേക് ഫിലിംസിനെ അനുകൂലിച്ചും വിമര്‍ശിച്ചും ഒട്ടേറെ പേര്‍ രംഗത്ത് വന്നിട്ടുണ്ട്. ഒരു സിനിമ പരാജയപ്പെടുമ്പോള്‍ അതിന്റെ ഉത്തരവാദിത്തം നായകന്റെ ചുമലില്‍ മാത്രം കെട്ടിവയ്ക്കുന്നതെന്നും സംവിധായകനും തിരക്കഥാകൃത്തിനും അതില്‍ പങ്കില്ലേ എന്നും വിമര്‍ശകര്‍ ചോദിക്കുന്നുണ്ട്.
Read more
2020 ഫെബ്രുവരി 14ന് പുറത്തിറങ്ങിയ വേള്‍ഡ് ഫെയ്മസ് ലവര്‍ ക്രാന്തി മാധവാണ് സംവിധാനം ചെയ്തത്. 35 കോടി മുതല്‍ മുടക്കിലൊരുക്കിയ ചിത്രം വന്‍ പരാജയമായിരുന്നു. റാഷി ഖന്ന, ഐശ്വര്യ രാജേഷ്, കാതറിന്‍ തെരേസ, ഇസബെല്ല ലെയ്തി തുടങ്ങി നിരവധി താരങ്ങളും ചിത്രത്തിന്റെ ഭാഗമായിരുന്നു.
