അര്ബുദത്തെ അതിജീവിച്ച് ജീവിതത്തിലേക്ക് മടങ്ങി വന്ന നടി ശരണ്യയെ വീണ്ടും രോഗം പിടിമുറുക്കിയിരിക്കുകയാണ്. ശരണ്യയെ വീണ്ടും ട്യൂമര് വേദനിപ്പിക്കാന് എത്തിയെന്ന വിവരം നടിയുടെ അമ്മയാണ് സോഷ്യല് മീഡിയയിലൂടെ അറിയിച്ചത്. സര്ജറി വിജയകരമായി പൂര്ത്തിയായതിന് ശേഷമുള്ള വിശേഷങ്ങളാണ് നടി സീമ ജി. നായര് യൂട്യൂബ് ചാനലിലൂടെ പങ്കുവച്ചിരിക്കുന്നത്.
സീമ ജി. നായരുടെ വാക്കുകള്:
ശരണ്യയുടെ സുഖവവിവരങ്ങള് തേടി ആയിരക്കണക്കിന് കോളുകളാണ് വരുന്നത്. ഓപ്പറേഷന് വിജയകരമായി എന്ന് ഡോക്ടര്മാര് പറഞ്ഞു. എന്നാല് ഇതിനു തൊട്ടു മുമ്പ് നടന്ന സര്ജറിക്ക് ശേഷം രണ്ടു മാസത്തോളം ആശുപത്രിയില് ചിലവാക്കേണ്ടി വന്നിരുന്നു. കാരണം വീണ്ടും വീണ്ടും ഒരേ സ്ഥലത്താണ് ഓപ്പറേഷന് ചെയ്തു കൊണ്ടിരിക്കുന്നത്.
മുറിവുകള് ഉണങ്ങാന് ഒരുപാട് കാലതാമസം വരും. രണ്ടു മാസത്തിന് ശേഷം ആശുപത്രിയില് നിന്ന് വന്നപ്പോള് വീണ്ടും വേദന വന്ന് ആശുപത്രിയിലേക്ക് തന്നെ തിരിച്ചു പോവുകയായിരുന്നു. പുറത്തു നിന്നും വിഷമിക്കാം എന്നല്ലാതെ ശ്രീചിത്രയുടെ ഉള്ളിലേക്ക് അവളെ കാണാന് പോകാന് ആവില്ല. ചേച്ചിയെ മാത്രം (ശരണ്യയുടെ അമ്മ) ആണ് കോവിഡ് ടെസ്റ്റ് ചെയ്തതിന് ശേഷം കൂടെ നിര്ത്തിയിരിക്കുന്നത്.
Read more
ചേച്ചിയില് നിന്നും കിട്ടുന്ന വിവരങ്ങളാണ് ഞാന് പങ്കുവയ്ക്കുന്നത്. ഇപ്പോഴത്തെ ശരണ്യയുടെ സ്ഥിതി മുറിവ് ഉണങ്ങാന് കാലതാമസമെടുക്കും എന്നതാണ്. എത്രനാള് ആശുപത്രിയില് കിടക്കണം എന്ന് ഇനിയും ഡോക്ടര്മാര് പറഞ്ഞിട്ടില്ല.