ലോക്‌സഭാ തിരഞ്ഞെടുപ്പില്‍ ബിജെപി ടിക്കറ്റില്‍ മത്സരിക്കാന്‍ ആഗ്രഹിക്കുന്നുവെന്ന് വെളിപ്പെടുത്തി നടി കങ്കണ റണാവത് കഴിഞ്ഞ ദിവസം രംഗത്തെത്തിയിരുന്നു. കങ്കണയുടെ ആഗ്രഹത്തിന് മറുപടിയുമായി എത്തിയിരിക്കുകയാണ് ബിജെപി ദേശീയ അദ്ധ്യക്ഷന്‍ ജെപി നദ്ദ ഇപ്പോള്‍.

ഹിമാചല്‍ പ്രദേശിലെ മണ്ഡി മണ്ഡലത്തില്‍ നിന്ന് മത്സരിക്കാനാണ് ആഗ്രഹം. ജനങ്ങള്‍ ആഗ്രഹിക്കുകയും ബിജെപി ടിക്കറ്റ് നല്‍കുകയും ചെയ്താല്‍ മത്സരിക്കും എന്നാണ് കങ്കണ പറഞ്ഞത്. കങ്കണയെ ബിജെപിയിലേക്ക് സ്വാഗതം ചെയ്യുന്നു എന്നാണ് ജെപി നദ്ദ പറഞ്ഞിരിക്കുന്നത്.

എന്നാല്‍ തിരഞ്ഞെടുപ്പില്‍ മത്സരിക്കുന്നത് സംബന്ധിച്ച് കൂടിയാലോചനയ്ക്ക് ശേഷമാണ് തീരുമാനം എടുക്കുകയെന്നും നദ്ദ പറയുന്നു. സമീപകാലത്ത് രാജ്യം ചര്‍ച്ച ചെയ്ത പല വിഷയങ്ങളിലും ബിജെപി അനുകൂല നിലപാട് സ്വീകരിച്ച നടിയാണ് കങ്കണ.

എല്ലാ തരം ജന വിഭാഗങ്ങളോടും തുറന്ന സമീപനമാണ് തനിക്കുള്ളത് എന്നായിരുന്നു രാഷ്ട്രീയ പ്രവേശനമുണ്ടാകുമോ എന്ന ചോദ്യത്തിന് കങ്കണ മറുപടി നല്‍കിയത്. ഹിമാചല്‍ പ്രദേശിലെ ആളുകള്‍ അവരെ സേവിക്കാന്‍ തനിക്ക് അവസരം നല്‍കിയാല്‍ മികച്ചതായിരിക്കും.

അവരുടെ ഉന്നമനത്തിനായി പ്രവര്‍ത്തിക്കുമെന്നും കങ്കണ പറഞ്ഞു. പ്രധാനമന്ത്രി മോദിയെയും കങ്കണ പുകഴ്ത്തി. മോദി രാജ്യത്തിന്റെ മഹാപുരുഷനാണെന്നും 2024ല്‍ മോദിയും രാഹുല്‍ ഗാന്ധിയുമായിട്ട് ആയിരിക്കും മത്സരമെന്നും കങ്കണ പറഞ്ഞു. ആര് മത്സരിച്ചാലും മോദിക്ക് എതിരാളിയാകില്ലെന്നും കങ്കണ പറഞ്ഞു.

അതേസമയം, ‘എമര്‍ജന്‍സി’ ആണ് താരത്തിന്റെതായി റിലീസിന് ഒരുങ്ങുന്ന ചിത്രം. കങ്കണ തന്നെ സംവിധാനം ചെയ്യുന്ന ചിത്രത്തില്‍ ഇന്ദിരാ ഗാന്ധി ആയാണ് താരം വേഷമിടുന്നത്. അനുപം ഖേര്‍, സതീഷ് കൗശിക്, ശ്രേയസ് തല്‍പാഡെ, മിലിന്ദ് സോമന്‍ എന്നിവരും ചിത്രത്തിലുണ്ട്. ‘തേജസ്’ എന്ന ചിത്രവും നടിയുടെതായി അണിയറയില്‍ ഒരുങ്ങുന്നുണ്ട്.