ലോക്സഭാ തിരഞ്ഞെടുപ്പ് അടുത്തു കൊണ്ടിരിക്കവെ കൂടുതല്‍ ബോളിവുഡ് താരങ്ങള്‍ ബിജെപിയിലേക്ക്. മുംബൈ ബിജെപി അധ്യക്ഷന്‍ ആശിഷ് ഷെലാര്‍ കഴിഞ്ഞ ദിവസം നടന്‍ സല്‍മാന്‍ ഖാനെ വീട്ടിലെത്തി സന്ദര്‍ശിച്ചു. സല്‍മാന്‍ ഖാനും നടന്റെ മാതാപിതാക്കളുമായും കൂടിക്കാഴ്ച നടത്തിയ വിവരം ഷെലാര്‍ തന്നെയാണ് ചിത്രങ്ങള്‍ പുറത്തുവിട്ട് അറിയിച്ചത്.
ബാന്ദ്ര വെസ്റ്റ് എംഎല്‍എ കൂടിയാണ് ആശിഷ് ഷെലാര്‍. സാലിം ഖാന്‍, ഹെലന്‍, സല്‍മാന്‍ ഖാന്‍ എന്നിവരെയും കുടുംബത്തെയും ഉച്ചയൂണിനൊപ്പം കാണാനായതിന്റെ സന്തോഷത്തിലാണെന്ന് ഷെലാര്‍ എക്സില്‍ കുറിച്ചു. ഇതോടെ ബിജെപിയുടെ പ്രചാരണ പരിപാടികളില്‍ സല്‍മാനും മുന്നിട്ടറങ്ങിയേക്കും എന്നാണ് സൂചനകള്‍.
Pleased to meet Shri Salim Khan ji, Smt Helen ji, @BeingSalmanKhan & family over lunch & discuss their social work in areas of healthcare & assisting the needy- started by Salim ji & pursued for two decades with utmost sincerity!! #Charity pic.twitter.com/TNq4IvQsKy
— ॲड. आशिष शेलार ( MODI KA PARIVAR ) (@ShelarAshish) April 7, 2024
നരേന്ദ്ര മോദി ഗുജറാത്ത് മുഖ്യമന്ത്രിയായ കാലംതൊട്ടേ അടുത്ത ബന്ധമുള്ളയാളാണ് സല്‍മാന്‍ ഖാന്‍ എന്ന വിവരങ്ങളും പുറത്തുവരുന്നുണ്ട്. ഇത്തവണ ലോക്സഭാ തിരഞ്ഞെടുപ്പില്‍ മൂന്ന് ബോളിവുഡ് താരങ്ങളാണ് ബിജെപി ടിക്കറ്റില്‍ മത്സര രംഗത്തുള്ളത്.
കങ്കണ റണാവത്ത്, ഹേമ മാലിനി, അരുണ്‍ ഗോവില്‍ എന്നിവരാണ് ജനവിധി തേടാനിറങ്ങുന്നത്. ഉത്തര്‍പ്രദേശിലെ മഥുരയില്‍ നിന്ന് ഒരിക്കല്‍ കൂടി ജനവിധി തേടുകയാണ് ഹേമ മാലിനി. 2014 മുതല്‍ തുടര്‍ച്ചയായി മൂന്നാം തവണയാണ് അവര്‍ ഇവിടെ മത്സരിക്കുന്നത്.
ഹിമാചല്‍ പ്രദേശിലെ മാണ്ഡിയില്‍ നിന്നാണ് കങ്കണ റണാവത്ത് മത്സരത്തിന് ഇറങ്ങുന്നത്. ഏറെ നാളുകളായുള്ള അഭ്യൂഹങ്ങള്‍ക്ക് പിന്നാലെ ആയിരുന്നു കങ്കണയുടെ സ്ഥാനാര്‍ത്ഥിത്വം പ്രഖ്യാപിച്ചത്. ‘രാമായണം’ ടെലിവിഷന്‍ പരമ്പരയിലൂടെ ശ്രദ്ധ നേടിയ അരുണ്‍ ഗോവില്‍ യുപിയിലെ മീററ്റില്‍ നിന്നാണ് മത്സരിക്കുന്നത്.
