മൂന്ന് മലയാള ചിത്രങ്ങള്‍ ഒന്നിച്ച് തിയേറ്ററില്‍ എത്തിയെങ്കിലും ബോക്‌സ് ഓഫീസില്‍ ‘ആടുജീവിത’ത്തിന് കുലുക്കമില്ല. 2 കോടിയാണ് ചിത്രം ഇന്നലെ മാത്രം നേടിയ കളക്ഷന്‍. മാര്‍ച്ച് 28ന് റിലീസ് ചെയ്ത ചിത്രം ഇപ്പോഴും പ്രദര്‍ശനം തുടരുകയാണ്. എന്നാല്‍ രണ്ട് ദിവസം മുമ്പ് റിലീസ് ചെയ്ത പൃഥ്വിരാജിന്റെ ബോളിവുഡ് ചിത്രത്തിന് കാലിടറയിരിക്കുകയാണ്.
സമ്മിശ്ര പ്രതികരണമാണ് ചിത്രത്തിന് ആദ്യം ദിനം തന്നെ തിയേറ്ററുകളില്‍ നിന്നും ലഭിച്ചത്. 15.5 കോടി രൂപയാണ് ആദ്യ ദിനം ചിത്രം നേടിയതെങ്കിലും 320 കോടി ബജറ്റില്‍ ഒരുക്കിയ ചിത്രത്തെ സംബന്ധിച്ച് ഈ തുക നിരാശപ്പെടുത്തുന്നതാണ്. ഈദ് റിലീസ് ആയി ചിത്രത്തിന് നെഗറ്റീവ് അഭിപ്രായങ്ങളും ലഭിക്കുന്നുണ്ട്.
അക്ഷയ് കുമാറിന്റെ ആരാധകര്‍ ആദ്യ ദിനം സിനിമയെ പിന്തുണച്ചെത്തിയെങ്കിലും രണ്ടാം ദിനം മുതല്‍ സിനിമ വീഴുമെന്നാണ് ട്രേഡ് അനലിസ്റ്റുകള്‍ പറയുന്നത്. ഹൃതിക് റോഷന്റെ ‘ഫൈറ്റര്‍’ ആണ് ഈ വര്‍ഷം ആദ്യ ദിനം ഏറ്റവും കൂടുതല്‍ പണം വാരിയ ഹിന്ദി ചിത്രം. 24.6 കോടിയായിരുന്നു സിനിമയുടെ ഓപ്പണിംഗ് കളക്ഷന്‍.
ബഡേ മിയാന്‍ ചിത്രത്തില്‍ കബിര്‍ എന്ന വില്ലന്‍ കഥാപാത്രത്തെയാണ് പൃഥ്വിരാജ് അവതരിപ്പിച്ചത്. ബഡേ മിയാന്‍ അടക്കം പൃഥ്വിരാജ് ഇതുവരെ വേഷമിട്ട എല്ലാ ബോളിവുഡ് ചിത്രങ്ങളും പരാജയമായിരുന്നു. അയ്യ, ഔറംഗസേബ്, നാം ശബ്‌ന എന്നിവയാണ് പൃഥ്വിരാജിന്റെ മറ്റ് സിനിമകള്‍.
അതേസമയം, അക്ഷയ് കുമാറിന്റെ കരിയറില്‍ വീണ്ടും ഒരു ഫ്‌ളോപ്പ് കൂടി ഉണ്ടായിരിക്കുകയാണ്. 2020 മുതല്‍ 2024 വരെ ഇതുവരെ റിലീസ് ചെയ്ത മിക്ക അക്ഷയ് ചിത്രങ്ങളും ഫ്‌ളോപ്പുകളാണ്. 13 സിനിമകള്‍ പരാജയപ്പെട്ടപ്പോള്‍ കഴിഞ്ഞ വര്‍ഷം പുറത്തിറങ്ങിയ ‘ഓഎംജി 2’ എന്ന ചിത്രം മാത്രമായിരുന്നു വിജയിച്ചിരുന്നത്.
