ബോളിവുഡ് താരം സല്‍മാന്‍ ഖാന്റെ സഹോദരി അര്‍പ്പിതയെ വിവാഹം ചെയ്യണമെന്ന് പറഞ്ഞപ്പോള്‍ വീട്ടില്‍ നിന്നുണ്ടായ എതിര്‍പ്പിനെ കുറിച്ച് തുറന്നു പറഞ്ഞ് നടന്‍ ആയുഷ് ശര്‍മ്മ. 24-ാം വയസിലാണ് ആയുഷ് അര്‍പ്പിതയെ വിവാഹം ചെയ്യുന്നത്. സ്വന്തമായി സമ്പാദിക്കാന്‍ തുടങ്ങുന്നതിന് മുമ്പായിരുന്നു ഇവരുടെ വിവാഹം. ഇതാണ് ആയുഷിന്റെ വീട്ടുകാര്‍ വിവാഹത്തെ എതിര്‍ക്കാനുള്ള കാരണം.

മുതിര്‍ന്ന കോണ്‍ഗ്രസ് നേതാവ്, പണ്ഡിറ്റ് സുഖ് റാമിന്റെ ചെറുമകനാണ് ആയുഷ്. അര്‍പ്പിതയെ തന്റെ മാതാപിതാക്കള്‍ക്ക് പരിചയപ്പെടുത്തിയപ്പോള്‍ ഞെട്ടലോടെയാണ് അവര്‍ പ്രതികരിച്ചത് എന്നാണ് ആയുഷ് പറയുന്നത്. ‘നിനക്ക് ജോലിയൊന്നും ഇല്ല, നീ പണം സമ്പാദിക്കുന്നില്ല. അതിനു പുറമേ നീ വിവാഹം കഴിക്കുന്നത് വളരെ സമ്പന്നയായ ഒരു പെണ്‍കുട്ടിയെ’.

‘അവളുടെ ചിലവുകള്‍ നീ എങ്ങനെ കൈകാര്യം ചെയ്യും’ എന്നായിരുന്നു വിവാഹ കാര്യം പറഞ്ഞപ്പോഴുള്ള അച്ഛന്റെ മറുപടി. പക്ഷെ എന്റെ മറുപടി അവരെ സ്ഥംഭിപ്പിച്ചു. അര്‍പ്പിതയുടെ ചിലവിനും നിങ്ങള്‍ പണം തരുമോ എന്നായിരുന്നു ഞാന്‍ ചോദിച്ചത്.

‘നീ പ്രണയിച്ചു, നീ വിവാഹം കഴിക്കുന്നു, ഇനി അതിനും ഞാന്‍ ബില്ലടയ്ക്കണോ’ എന്നാണ് അച്ഛന്‍ ചോദിച്ചത്. ഞാന്‍ ഒരു രാഷ്ട്രീയ കുടുംബത്തില്‍ നിന്നും അര്‍പ്പിത ഒരു സിനിമാ കുടുംബത്തില്‍ നിന്നും വരുന്നതിനാല്‍ ഞങ്ങളുടെ കുടുംബങ്ങള്‍ ഒത്തുപോകുമോ എന്ന് അമ്മയ്ക്ക് ആശങ്കയുണ്ടായിരുന്നു എന്നാണ് ആയുഷ് പറയുന്നത്.

ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് ആയുഷ് പ്രതികരിച്ചത്. 2014ല്‍ ആണ് അര്‍പ്പിതയും ആയുഷും വിവാഹിതരായത്. രണ്ട് കുട്ടികളുടെ മാതാപിതാക്കളാണ് ഇരുവരും. മകള്‍ അയത്ത് മകന്‍ അഹില്‍ ശര്‍മ്മ.