ബിഗ്‌ബോസ് താരം ഡോ.റോബിന്‍ രാധാകൃഷ്ണന്റെ സോഷ്യല്‍ മീഡിയയിലൂടെയുള്ള വൈകാരിക വെല്ലുവിളിയെ ട്രോളി സോഷ്യല്‍ മീഡിയ. ബിഗ്‌ബോസില്‍ പങ്കെടുക്കുമ്പോള്‍ മുതല്‍ റോബിന്‍ പ്രയോഗിച്ചിരുന്ന ഒരു വാക്ക് എടുത്തിട്ട് അലക്കിയാണ് സോഷ്യല്‍ മീഡിയയില്‍ ട്രോളുകള്‍ പിറന്നിരിക്കുന്നത്.
ഡോ.റോബിന്‍ രാധാകൃഷ്ണനും നടിയും സംരംഭകയുമായ ആരതി പൊടിയും തമ്മിലുള്ള വിവാഹ നിശ്ചയം ഫെബ്രുവരി 16നാണ് നടന്നത്. ഇതിന്റെ വാര്‍ത്തകളും ചിത്രങ്ങളും സോഷ്യല്‍ മീഡിയയില്‍ വൈറലായിരുന്നു. തുടര്‍ന്ന് ആരതി പൊടിയും വിവാഹ നിശ്ചയ ചടങ്ങില്‍ അണിഞ്ഞ വസ്ത്രം കോപ്പിയടിച്ചതാണെന്ന് വിവാദം ഉയര്‍ന്നിരുന്നു. തങ്ങളുടെ ഡിസൈന്‍ കോപ്പിയടിച്ചാണ് ആരതി വിവാഹ നിശ്ചയത്തിന് ധരിച്ച ലെഹങ്ക ഉണ്ടാക്കിയത് എന്ന് ആരോപിച്ച് ജെസാഷ് സ്റ്റുഡിയോ എന്ന സ്ഥാപനം രംഗത്തുവന്നിരുന്നു. ഇത് ബിഗ് ബോസ് താരം റിയാസ് ഏറ്റെടുക്കുകയും ചെയ്തിരുന്നു.
എന്നാല്‍, പിന്നീട് തനിക്ക് തെറ്റ് പറ്റിയതാണെന്നും ആരതി പൊടിക്കുണ്ടായ വേദനയില്‍ ക്ഷമ ചോദിക്കുകയാണെന്നും വ്യക്തമാക്കി സ്ഥാപനം പ്രസ്താവന പുറത്തിറക്കി. പിന്നീടും റിയാസ് ആരോപണം പിന്‍വലിക്കാന്‍ തയാറായില്ല. കോപ്പിയടിക്കുമ്പോള്‍ കുറഞ്ഞപക്ഷം അതിന് ക്രഡിറ്റ് കൊടുക്കണം എന്നാണ് റിയാസ് പറഞ്ഞത്. ഇതിന് പിന്നാലെ ആരതി പൊടി തന്റെ ഭാഗം വിശദീകരിച്ച് രംഗത്തെത്തി. വേണെമെങ്കില്‍ ആരോപണത്തെ നിയമപരമായി തന്നെ നേരിടാം ആരതിയുടെ പ്രതികരണം. വ്യാജ ആരോപണം ഉയര്‍ത്തിയ റിയാസിനെതിരെ നിയമനടപടി സ്വീകരിക്കുമെന്നും ആരതി പൊടി വ്യക്തമാക്കിയിരുന്നു.
ഇതിനിടെയാണ് വൈകാരികമായി ഭീഷണി ഉയര്‍ത്തി ഡോ.റോബിന്‍ രാധാകൃഷ്ണന്‍ രംഗത്തെത്തിയത്. ആരതിയുടെ ഫോട്ടോ ഇന്‍സ്റ്റഗ്രാമില്‍ പങ്കിട്ട് കൊണ്ടാണ് വൈകാരികമായി റോബിന്‍ പ്രതികരിച്ചിരിക്കുന്നത്. ‘അപ്പോള്‍ കോസ്റ്റ്യൂം: ആരതി പൊടി. നോട്ട്-ആരതി പൊടി ഇപ്പോള്‍ ഔദ്യോഗികമായി എന്റെ പെണ്ണായിരിക്കുകയാണ്. അവള്‍ക്ക് ചുറ്റും നടക്കുന്ന എല്ലാ കാര്യങ്ങളും ഞാന്‍ കാണുന്നുണ്ട്. ഇപ്പോള്‍ ഇക്കാര്യത്തില്‍ ഞാന്‍ പ്രതികരിക്കുന്നില്ല. ഇനിയും ആരെങ്കിലും എന്റെ പെണ്ണിനെ മനപ്പൂര്‍വ്വം വേദനിപ്പിക്കാന്‍ ശ്രമിച്ചെങ്കില്‍ അവന്റെ മൂക്കാമണ്ട ഞാന്‍ അടിച്ച് കറക്കും, അത് ചെയ്തിരിക്കും, അതുകൊണ്ട് സൂക്ഷിച്ചോ, ഇതൊരു മുന്നറിയിപ്പായി എടുക്കണം.. എന്നാണ് അദേഹം കുറിച്ചത്. ഇതിനെയാണ് ഇപ്പോള്‍ ട്രോളി സോഷ്യല്‍ മീഡിയ രംഗത്തെത്തിയിരിക്കുന്നത്. വിമര്‍ശനങ്ങള്‍ അതിന്റെ രീതിയില്‍ കാണണമെന്നും മൂക്കാമണ്ട ഇടിച്ചു തകര്‍ക്കാന്‍ റോബിന്‍ ഗുണ്ടയാണോയെന്നും ചിലര്‍ ചോദിക്കുന്നുണ്ട്.
Read more
