2024 ൽ പരസ്യങ്ങളിൽ നിന്ന് യുട്യൂബ് നേടിയത് കോടികൾ. മൂന്ന് ലക്ഷം കോടിയിലേറെ രൂപ വാർഷിക വരുമാനം നേടിയെന്നാണ് 2024ലെ റിപ്പോർട്ടിൽ പറയുന്നത്. പരസ്യ വിൽപ്പനയിൽ നിന്ന് മാത്രം ആണ് ഇത്രയും വരുമാനം. കഴിഞ്ഞ വർഷം 36.2 ബില്യൺ ഡോളർ ആണ് പരസ്യത്തിൽ നിന്ന് യൂട്യൂബിനു ലഭിച്ച വരുമാനം.
റിപ്പോർട്ട് അനുസരിച്ച് പരസ്യങ്ങളിൽ നിന്ന് മാത്രം 2024-ലെ അവസാനത്തിൽ ഗൂഗിളിന്റെ ഉടമസ്ഥതയിലുള്ള വീഡിയോ സ്ട്രീമിംഗ് പ്ലാറ്റ്ഫോമായ യൂട്യൂബിനു ലഭിച്ചത് 10.47 ബില്യൺ ഡോളറാണ്. ഈ വരുമാനത്തിന് മുഖ്യ കാരണമായത് അമേരിക്കൻ പ്രസിഡന്റ് തിരഞ്ഞെടുപ്പാണ് എന്നാണ് റിപ്പോർട്ടുകൾ സൂചിപ്പിക്കുന്നത്. അമേരിക്കയിൽ 45 ദശലക്ഷത്തിലധികം ആളുകൾ യൂട്യൂബിൽ ഇലക്ഷൻസുമായി ബന്ധപ്പെട്ട ഉള്ളടക്കം കണ്ടുവെന്നാണ് ഗൂഗിളുമായി ബന്ധപ്പെട്ട റിപോർട്ടുകൾ വ്യക്തമാക്കുന്നത്.
അതേസമയം ചില ഉപയോക്താക്കൾക്ക് യൂട്യൂബ് നിരവധി തവണ പരസ്യങ്ങൾ കാണിക്കുന്നുണ്ടെന്ന് റിപ്പോർട്ടുകൾ വന്നിരുന്നു. ഇതു കാരണം ചില ഉപയോക്താക്കൾ യൂട്യൂബ് പ്രീമിയം വാങ്ങാൻ നിർബന്ധിതരാകുന്നുവെന്നും പരാതികൾ ഉണ്ട്. കഴിഞ്ഞ കുറച്ച് ദിവസങ്ങളായി, ചില ഉപയോക്താക്കൾക്ക് യൂട്യൂബ് നിരവധി മണിക്കൂർ പരസ്യങ്ങൾ കാണിക്കുന്നുണ്ടെന്ന് റിപ്പോർട്ടുകൾ ഉണ്ട്. പലർക്കും അവ ഒഴിവാക്കാൻ പോലും കഴിയുന്നില്ലെന്നും വിവിധ റിപ്പോർട്ടുകൾ പറയുന്നു. അതേസമയം പരസ്യ ബ്ലോക്കറുകൾക്കെതിരെ യൂട്യൂബ് ഒരു കാമ്പയിൻ ആരംഭിച്ചിട്ടുണ്ട്.
