2026 ഫിഫ ലോകകപ്പിന് പുതിയ ഫോര്‍മാറ്റ് ആകും എന്ന് ഉറപ്പാകുന്നു. ഫിഫ പുതിയ ഫോര്‍മേറ്റ് അംഗീകരിക്കാന്‍ ഒരുങ്ങുകയാണെന്ന് യൂറോപ്യന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇത് സംബന്ധിച്ച ഔദ്യോഗിക പ്രഖ്യാപനം ഉടന്‍ ഉണ്ടാകുമെന്നാണ് അറിയുന്നത്.
അമേരിക്ക, മെക്‌സിക്കോ, കാനഡ എന്നിവിടങ്ങളിലായാണ് അടുത്ത ലോകകപ്പ് നടക്കുന്നത്. ആ ടൂര്‍ണമെന്റില്‍ 32 ടീമുകള്‍ അല്ല 48 ടീമുകള്‍ ആകും മത്സരിക്കുക. 4 ടീമുകളുള്ള 12 ഗ്രൂപ്പുകളിലായി ടീമുകള്‍ മാറ്റുരക്കും.
ഓരോ ടീമും ഗ്രൂപ്പ് ഘട്ടത്തില്‍ 3 ഗെയിമുകള്‍ കളിക്കും, ഓരോ ഗ്രൂപ്പില്‍ നിന്നും മികച്ച 2 ടീമുകളും മൂന്നാം സ്ഥാനക്കാരായ 8 മികച്ച ടീമുകളും റൗണ്ട് ഓഫ് 32 റൗണ്ടിലേക്ക് മുന്നേറും. ടൂര്‍ണമെന്റ് 56 ദിവസം നീണ്ടു നില്‍ക്കും. കിരീടം ഉയര്‍ത്താന്‍ ഒരു ടീം 8 മത്സരങ്ങള്‍ കളിക്കേണ്ടതായി വരും. 2026 ജൂലൈ 19ന് ഫൈനല്‍ നടക്കും.
Read more
ഈ പുതിയ ഫോര്‍മാറ്റിലൂടെ പുതിയ പല രാജ്യങ്ങള്‍ക്കും ലോകകപ്പില്‍ അവസരം ലഭിക്കും. 48 ടീമുകളില്‍ 16 ടീമുകള്‍ യൂറോപ്പില്‍ നിന്നാകും എന്നാണ് റിപ്പോര്‍ട്ടുകള്‍. ഈ മാറ്റം ഇന്ത്യ പോലുള്ള രാജ്യങ്ങള്‍ക്കും ലോകകപ്പ് സ്വപ്നം കാണാന്‍ അവസരമാകും
