ക്രിക്കറ്റ് ആരാധകരെ വിഭിന്നമായ ബാറ്റിംഗ് ശൈലികൊണ്ട്, രണ്ട് വ്യത്യസ്ത കാലഘട്ടങ്ങളില് രസിപ്പിച്ച ഇതിഹാസങ്ങളാണ് ഇന്ത്യയുടെ സച്ചിന് ടെണ്ടുല്ക്കറും വെസ്റ്റിന്ഡീസിന്റെ വിവ് റിച്ചാര്ഡ്സും. സച്ചിന്റെ കരിയര് തുടങ്ങി അധികം പിന്നിടും മുന്പേ റിച്ചാര്ഡ്സ് ക്രിക്കറ്റിനോട് വിടചൊല്ലി. എങ്കിലും റിച്ചാര്ഡ്സിന്റെ വന്യമായ ബാറ്റിംഗ് കരുത്ത് പകരുന്ന ഹരം കളിയാരാധകര്ക്ക് അവിസ്മരണീയമായ അനുഭവമായിരുന്നു. റിച്ചാര്ഡ്സിന്റെ കാലശേഷം സച്ചിന് ക്ലാസിക് ബാറ്റിംഗിലൂടെ ക്രിക്കറ്റ് പ്രേമികള്ക്ക് നവ്യാനുഭൂതി പകര്ന്നു. സച്ചിനും റിച്ചാര്ഡ്സും ഒരിക്കല് ചെസ് കളത്തില് കൊമ്പുകോര്ത്തു.
ലോക ചെസ് ദിനമായ ജൂലൈ 20ന് സച്ചിന് ട്വിറ്ററില് പങ്കുവച്ച ചിത്രമാണ് റിച്ചാര്ഡ്സുമായുള്ള മാസ്റ്റര് ബ്ലാസ്റ്ററിന്റെ അപൂര്വ്വ സൗഹൃദം വെളിപ്പെടുത്തുന്നത്. ഒരു ടീപ്പോയില് വച്ച ചെസ് ബോര്ഡില് റിച്ചാര്ഡ്സ് കറുത്ത കരുക്കള് നീക്കുന്നതാണ് ഫോട്ടോയിലുള്ളത്. എതിരാളിയായ സച്ചിന് ചിരിയോടെ ആ നീക്കം വീക്ഷിക്കുന്നു. സച്ചിനൊപ്പം സോഫയില് വീരേന്ദര് സെവാഗും യുവരാജ് സിംഗും കളികണ്ടിരിപ്പുണ്ട്. സെവാഗ് ചെറുതായി പുഞ്ചിരിക്കുമ്പോള് യുവി നന്നായി ചിരിച്ച് ഫോട്ടോയ്ക്ക് പോസ് ചെയ്യുന്നു.
Playing on a slighty different f̶i̶e̶l̶d̶ board! 😀♟️ @ivivianrichards @virendersehwag @YUVSTRONG12 #WorldChessDay pic.twitter.com/BRd6zf3nyc
— Sachin Tendulkar (@sachin_rt) July 20, 2021
Read more
കളിക്കളത്തിലെ എതിരാളികളെ എന്നും കളത്തിനു പുറത്ത് സൗഹാര്ദ്ദപൂര്വം ചേര്ത്തു പിടിക്കാറുള്ളയാളാണ് സച്ചിന്. വെസ്റ്റിന്ഡീസ് ബാറ്റിംഗ് പ്രതിഭയും സമകാലികനുമായ ബ്രയാന് ലാറയുമായുള്ള സച്ചിന്റെ സൗഹൃദം വിഖ്യാതം. ലാറ ഇന്ത്യയിലെത്തിയാല് മുംബൈയിലെ സച്ചിന്റെ വീട് സന്ദര്ശിച്ചേ മടങ്ങാറുള്ളു. പലപ്പോഴും അധികമാരും അറിയാത്ത ഈ സൗഹൃദസംഗമം സച്ചിന് സോഷ്യല് മീഡിയയില് ചിത്രം പോസ്റ്റ് ചെയ്യുമ്പോള് മാത്രമേ വെളിപ്പെടാറുള്ളൂ.