വരുന്ന ടി20 ലോക കപ്പോടെ രവി ശാസ്ത്രി ഇന്ത്യന്‍ ക്രിക്കറ്റ് ടീമിന്റെ പരിശീലക സ്ഥാനം ഒഴിയാനിരിക്കെ പുതിയ പരിശീലകനായുള്ള നെട്ടോട്ടത്തിലാണ് ബിസിസിഐ. പരിശീലകനാകുമെന്നും ഏവരും ഉറപ്പിച്ചിരുന്ന രാഹുല്‍ ദ്രാവിഡ് അതില്‍ താത്പര്യമില്ലെന്ന് അറിയിച്ചതാണ് ബിസിസിഐയുടെ കണക്കുകൂട്ടലുകള്‍ തെറ്റിച്ചിരിക്കുന്നത്. പിന്നെ ഉയര്‍ന്നു വന്നത് വിവിഎസ് ലക്ഷ്മണിന്റെയും മുന്‍ പരിശീലകന്‍ അനില്‍ കുംബ്ലെയുടെയും പേരുകളായിരുന്നു. ഇവരും ഇന്ത്യയുടെ പരിശീലകനാവാന്‍ താത്പര്യമില്ലെന്ന് അറിയച്ചെന്നാണ് വിവരം. ഇതേ തുടര്‍ന്ന് വിദേശ കോച്ചിനായുള്ള തിരച്ചിലിലാണ് ബിസിസിഐ എന്നാണ് വിവരം.
‘അനില്‍ കുംബ്ലെ തിരിച്ചുവരാന്‍ ആഗ്രഹിച്ചാല്‍ ബിസിസിഐയുടെ അംഗങ്ങള്‍ക്കും പ്രസിഡന്റ് സൗരവ് ഗാംഗുലിക്കുമെല്ലാം അത് വളരെ സന്തോഷമുള്ള കാര്യമാണ്. എന്നാല്‍ നിലവില്‍ ഒരു വിദേശ പരിശീലകനെ പരിഗണിക്കാനാണ് ബിസിസിഐ ആലോചിക്കുന്നത്. കുംബ്ലെ പരിശീലകനായെത്തുമ്പോള്‍ ടീമില്‍ പുതുമയില്ല.’
‘വിരാട് കോഹ്‌ലിയും രോഹിത്തും ഉള്‍പ്പെടുന്ന പഴയ താരങ്ങള്‍ തന്നെയാണ് ഇപ്പോഴുമുള്ളത്. അതു കൊണ്ട് എന്തിനാണ് മടങ്ങിവരുന്നതെന്നാണ് അദ്ദേഹം ചോദിക്കുന്നത്. ദാദയാണ് കുംബ്ളേയുടെ പേര് ആദ്യം നിര്‍ദേശിച്ചത്. ചില ഒഫീഷ്യല്‍സ് അതില്‍ താത്പര്യക്കുറവ് വ്യക്തമാക്കിയിരുന്നു.’
Read more
‘വിവിഎസ് ലക്ഷ്മണെയും ഈ സ്ഥാനത്തേക്ക് ലഭിക്കില്ല. എന്തായാലും ഒരു മാസത്തോളം ശേഷിക്കുന്നുണ്ട്. അതിനാല്‍ വരുന്ന ദിവസങ്ങളില്‍ എന്തൊക്കെയാണ് സംഭവിക്കാന്‍ പോകുന്നതെന്ന് കണ്ടറിയാം. അനില്‍ കുംബ്ലെയുടെ പരിശീലകനെന്ന നിലയിലെ റെക്കോഡുകളും അത്ര മികച്ചതല്ല. പഞ്ചാബ് കിംഗസിന്റെ ഐപിഎല്ലിലെ അവസ്ഥ നോക്കൂ’ ബിസിസിഐയുടെ മുതിര്‍ന്ന വൃത്തങ്ങളിലൊരാള്‍ പറഞ്ഞു.
