റോയൽ ചലഞ്ചേഴ്സ് ബെം​ഗളൂരു മെന്റർ ദിനേഷ് കാർത്തിക്കിനെ ട്രോളി മുൻ ഇം​ഗ്ലണ്ട് താരങ്ങളായ മൈക്കൽ ആതേർട്ടണും നാസർ ഹുസൈനും. ഐപിഎൽ 2025 ഫൈനൽ മത്സരത്തിനിടെ നടന്ന ഒരു സംഭവത്തെ മുൻനിർ‌ത്തിയായിരന്നു ഇരുവരും കാർത്തിക്കിനെ ട്രോളിയത്. ഫൈനലിലെ സ്ട്രെറ്റീജിക് ടൈംഔട്ടിൽ ആർസിബി ബാറ്റിങ്ങിനിടെ വിരാട് കോഹ്ലിയുമായി കാർത്തിക് കുറച്ചുസമയം ആശയവിനിമയം നടത്തിയിരുന്നു. എന്നാൽ‌ ഇതിന് ശേഷം അടുത്ത ഓവറിൽ തന്നെ വിരാട് കോഹ്ലി പുറത്തായി പവലിയനിലേക്ക് മടങ്ങി.

ദിനേഷ് കാർത്തിക്കും പങ്കെടുത്ത ഒരു പോഡ്കാസ്റ്റിനിടെയായിരുന്നു ഡികെയെ മുന്നിൽ ഇരുത്തി ആതേർട്ടണും നാസർ ഹുസൈനും താരത്തെ കളിയാക്കിയത്.  18 വർ‌ഷത്തെ കാത്തിരിപ്പിനൊടുവിൽ ആർസിബി ഐപിഎൽ കിരീടം നേടിയതിൽ കാർത്തിക്കിനെ അഭിനന്ദിച്ചുകൊണ്ടായിരുന്നു ഇരുവരും തുടങ്ങിയത്. പിന്നാലെ ഇക്കാര്യം പറഞ്ഞ് ഇരുവരും ഡികെയെ ട്രോളുകയായിരുന്നു.  “ഫൈനലിന് മുമ്പ്, ആർ‌സി‌ബി ജയിച്ചാൽ, നിങ്ങൾ ട്രോഫിയുമായി മുന്നിൽ തന്നെ ഉണ്ടാവുമെന്ന് ഞാൻ പ്രവചിച്ചു, അത് സത്യമായി മാറി.

രണ്ടാമതായി, ഫൈനലിൽ ഞാൻ ശ്രദ്ധിച്ചത്, ഒരു ടൈംഔട്ടിനിടെ നിങ്ങൾ വിരാട് കോഹ്‌ലിയോട് അടുത്തതായി എന്തുചെയ്യണമെന്ന് പറയാൻ വളരെ സമയം ചെലവഴിച്ചു എന്നതാണ്”. കോഹ്ലി ക്രീസിലുണ്ടായിരുന്നു, നിങ്ങൾ വളരെ നേരം വിരാടുമായി സംസാരിച്ചു. നിങ്ങളുടെ അഞ്ച് മിനിറ്റ് ആശയവിനിമയത്തിന് ശേഷം അടുത്ത ഓവറിൽ തന്നെ കോഹ്ലി പുറത്തായി എന്ന് ഞാൻ കരുതുന്നു. നിങ്ങൾ അദ്ദേഹത്തോട് എന്താണ് പറഞ്ഞതെന്ന് എന്നോട് പറയൂ,” മൈക്കൽ ആതേർട്ടൺ ഡികെയോട് ആവശ്യപ്പെട്ടു.

ഇതിന് മറുപടിയായി, “ഒരു പോഡ്‌കാസ്റ്റിൽ എന്നോട് ചോദിച്ചതിൽ വച്ച് ഏറ്റവും ബുദ്ധിമുട്ടുള്ള ചോദ്യമാണിതെന്ന് ഡികെ പറഞ്ഞു. ചോദ്യത്തിന്റെ ആദ്യ ഭാ​ഗം കുറച്ചെങ്കിലും എനിക്ക് കൈകാര്യം ചെയ്യാൻ കഴിയും. എന്നാൽ അവസാനം ചോദിച്ചതിനെ കുറിച്ച് ഞാൻ ഇപ്പോൾ‌ ചിന്തിക്കുകയാണ്., ജീവിതത്തെക്കുറിച്ച് ഭയപ്പെടാതെ ഞാൻ ചിന്തിക്കാൻ ശ്രമിക്കുകയാണ്, എനിക്ക് ശരിയായ ഉത്തരം പറയേണ്ടതുണ്ട്”, ചിരിച്ചുകൊണ്ട് ദിനേശ് കാർത്തിക്ക് പറഞ്ഞു.