ഇം​ഗ്ലണ്ടിനെതിരായ ടെസ്റ്റ് പരമ്പരയ്ക്ക് ഒരുങ്ങുന്ന ഇന്ത്യൻ ടീമിന്റെ വൈസ് ക്യാപ്റ്റൻ റിഷഭ് പന്തിന് ഒരു ഉപദേശവുമായി മുൻ ഇന്ത്യൻ താരം ഹേമങ് ബദാനി. വിരാട് കോഹ്ലി, രോഹിത് ശർമ്മ എന്നീ താരങ്ങൾ വിരമിച്ചതോടെ ഇന്ത്യൻ ടീമിലെ സീനിയർ താരങ്ങളിൽ ഒരാളാണ് ഇപ്പോൾ പന്ത്. ശുഭ്മാൻ ​ഗില്ലിനൊപ്പം തന്നെ ഇന്ത്യൻ ടെസ്റ്റ് ടീമിനെ മുന്നോട്ടുനയിക്കേണ്ട ഉത്തരവാദിത്തം പന്തിനുണ്ട്. ഏത് ഫോർമാറ്റിലായാലും ഒരു ടീമിന് അവരുടെ ലീഡർഷിപ്പ് ​ഗ്രൂപ്പുണ്ടാവും. വൈസ് ക്യാപ്റ്റനെന്ന നിലയിൽ വലിയ ഉത്തരവാദിത്തമാണ് ഇംഗ്ലണ്ട് പരമ്പരയിൽ റിഷഭ് പന്തിന് മുന്നിലുളളത്.

അതേസമയം ഇംഗ്ലണ്ടിനെതിരെ വൈസ് ക്യാപ്റ്റൻസി ബാറ്റിങ്ങിനെ ബാധിക്കാതെ നോക്കണമെന്നാണ് പന്തിനോട് ഹേമങ് ബദാനി ആവശ്യപ്പെട്ടത്. കോച്ച് ​ഗംതം ​ഗംഭീർ ഇക്കാര്യം ശ്രദ്ധിക്കണമെന്നും പന്തിനോട് ഇതേകുറിച്ച് സംസാരിച്ചാൽ‌ വൈസ് ക്യാപ്റ്റൻസി അവന്റെ ബാറ്റിങ്ങിനെ ബാധിക്കില്ലെന്നും ബദാനി പറഞ്ഞു.

“ഇം​ഗ്ലണ്ടിനെതിരെ പന്തിന്റെ വൈസ് ക്യാപ്റ്റൻസി അവന്റെ ബാറ്റിങ്ങിനെ ഒരിക്കലും ബാധിക്കില്ലെന്ന് ഞാൻ ആത്മാർഥമായി പ്രതീക്ഷിക്കുന്നു. ക്രിക്കറ്റിൽ ആക്രമണ സ്ട്രോക്ക്-മേക്കിംഗിന്റെയും പ്രതിരോധ സ്ട്രോക്ക്-മേക്കിംഗിന്റെയും ശരിയായ സന്തുലിതാവസ്ഥ കണ്ടെത്തിയ ഒരാളാണ് പന്ത് എന്ന് ഞാൻ കരുതുന്നു. അതിനാൽ നിങ്ങൾ അത് മാറ്റാൻ ശ്രമിക്കേണ്ട ഒരു കാരണവും ഞാൻ കാണുന്നില്ല”, ബദാനി പറഞ്ഞു.