ഇംഗ്ലണ്ടിനെതിരായ ടെസ്റ്റ് പരമ്പരയ്ക്കുളള ഇന്ത്യന്‍ ടീമില്‍ യുവതാരം സായി സുദര്‍ശനെ ഉള്‍പ്പെടുത്തിയതില്‍ പ്രതികരണവുമായി ചീഫ് സെലക്ടര്‍ അജിത് അഗാര്‍ക്കര്‍. ഐപിഎലിലെ പ്രകടനം നോക്കിയല്ല സായിയെ ടീമിലെടുത്തതെന്ന് അഗാര്‍ക്കര്‍ പറഞ്ഞു. നേരത്തെ ഏകദിനത്തിലും ടി20യിലും സായി കളിച്ചിട്ടുണ്ട്. സായി ഒരു മികച്ച ടെസ്റ്റ് പ്ലെയറാണെന്നും അദ്ദേഹത്തെ കുറച്ച് വര്‍ഷങ്ങളായി തങ്ങള്‍ ശ്രദ്ധിച്ചുവരികയാണെന്നും അഗാര്‍ക്കര്‍ പറയുന്നു.
‘കഴിഞ്ഞ വര്‍ഷം ഇംഗ്ലണ്ട് ലയണ്‍സ് വന്നപ്പോള്‍, സായി റണ്‍സ് നേടി. റെഡ് ബോള്‍ ക്രിക്കറ്റില്‍ നേരത്തെ തന്നെ അവന്‍ തിളങ്ങിയിട്ടുണ്ട്. അതുകൊണ്ട് ഐപിഎല്‍ കാരണമല്ല ഞങ്ങള്‍ അദ്ദേഹത്തെ ടീമിലെടുത്തത്. സായി ഒരു മികച്ച റെഡ്‌ബോള്‍ കളിക്കാരനാണ്, മത്സരങ്ങളില്‍ ശരിയായ സ്വഭാവം പ്രകടിപ്പിച്ചിട്ടുണ്ട്. ഉയര്‍ന്ന തലത്തില്‍ വിജയിക്കാന്‍ ആവശ്യമായ കളി അദ്ദേഹത്തിന് ഉണ്ടെന്ന് തോന്നുന്നു’, അജിത് അഗാര്‍ക്കര്‍ പറഞ്ഞു.
Read more
ഒരുതവണ അവന്‍ കളിച്ചുകഴിഞ്ഞാല്‍ നമുക്ക് കൂടുതല്‍ അടുത്തറിയാന്‍ സാധിക്കും. അദ്ദേഹത്തിന്റെ ഐപിഎല്‍ പ്രകടനങ്ങള്‍ ടെസ്റ്റ് ക്രിക്കറ്റിലേക്ക് അദ്ദേഹത്തെ തിരഞ്ഞെടുക്കാന്‍ ഞങ്ങളെ പ്രേരിപ്പിച്ചുവെന്ന് ഞാന്‍ കരുതുന്നില്ല. കുറച്ചുകാലമായി ഞങ്ങള്‍ അദ്ദേഹത്തെ നോക്കുന്നു, അജിത് അഗാര്‍ക്കര്‍ വ്യക്തമാക്കി. സായി സുദര്‍ശന് പുറമെ ഒരിടവേളയ്ക്ക് ശേഷം കരുണ്‍ നായര്‍ക്കും ഇന്ത്യന്‍ ടെസ്റ്റ് ടീമില്‍ സ്ഥാനം ലഭിച്ചു. സായിക്കൊപ്പം അര്‍ഷ്ദീപ് സിങിനും ആദ്യമായാണ് ടെസ്റ്റ് ടീമില്‍ അവസരം ലഭിക്കുന്നത്‌
