നാനാത്വത്തിൽ ഏകത്വം എന്നതാണ് ഇന്ത്യയുടെ രാഷ്ട്രഭാഷ എന്നും അതാണ് നമ്മൾ മുന്നോട്ടുവെക്കുന്ന സന്ദേശമെന്നും കനിമൊഴി. ഇന്ത്യയുടെ രാഷ്ട്രഭാഷ ഏതെന്ന ചോദ്യത്തിന് മറുപടി നൽകുകയായിരുന്നു കനിമൊഴി. സ്‌പെയിനിലെ ഇന്ത്യൻ പ്രവാസികളോട് സംസാരിക്കുകയായിരുന്നു കനിമൊഴി. ദേശീയ വിദ്യാഭ്യാസ നയത്തിൽ കേന്ദ്രസർക്കാരുമായി ഡിഎംകെ നേരിട്ട് ഏറ്റുമുട്ടുന്ന സാഹചര്യത്തിൽ കൂടിയായിരുന്നു കനിമൊഴിയുടെ ഈ മറുപടി.
ഓപ്പറേഷൻ സിന്ദൂർ വിശദീകരിക്കാനുള്ള ദൗത്യസംഘത്തിന്റെ ഭാഗമായി സ്‌പെയിനിൽ എത്തിയപ്പോഴായിരുന്നു ഇന്ത്യയുടെ രാഷ്ട്രഭാഷ ഏതെന്ന ചോദ്യത്തിന് കനിമൊഴി ഇത്തരത്തിൽ മറുപടി നൽകിയത്. രാഷ്ട്രഭാഷ, ഹിന്ദി എന്നീ വിഷയങ്ങളേപ്പറ്റി സദസ്സിൽ നിന്നൊരാൾ ചോദിച്ചപ്പോൾ ‘ഇന്ത്യയുടെ രാഷ്ട്രഭാഷ നാനാത്വത്തിൽ ഏകത്വം എന്നത് മാത്രമാണെന്നും, അതാണ് ഈ സംഘം ലോകത്തിന് മുൻപാകെ വെക്കുന്ന സന്ദേശം’ എന്നുമായിരുന്നു കനിമൊഴിയുടെ മറുപടി.
പരിപാടിയിൽ രാജ്യത്തിന്റെ നിലപാടുകൾ ഉയർത്തിപ്പിടിക്കുന്നതിൽ പ്രവാസികൾക്കുള്ള പങ്കിനെയും കനിമൊഴി അഭിനന്ദിച്ചു. ‘ സമാധാനത്തിന് വേണ്ടിയുള്ള ഇന്ത്യയുടെ നിലപാടുകൾ എത്തരത്തിലായിരുന്നുവെന്ന് പ്രവാസികൾക്ക് ലോകത്തിനോട് എളുപ്പം പറയാൻ സാധിക്കും. നമ്മുടെ സ്വതന്ത്ര സമരം പോലും അഹിംസയിൽ ഊന്നിയുള്ളതായിരുന്നു. നിങ്ങൾക്ക് ആളുകളെ സ്വാധീനിക്കാനാകും’ കനിമൊഴി പറഞ്ഞു.
Read more
