തിരുവനന്തപുരം യുഡിഎഫ് സ്ഥാനാര്‍ത്ഥി ശശി തരൂരിനെതിരെ കടകംപള്ളി സുരേന്ദ്രന്റെ ഫേസ്ബുക് പോസ്റ്റ്. എല്‍ഡിഎഫ് സ്ഥാനാര്‍ത്ഥി പന്ന്യന് രവീന്ദ്രനെതിരെ തരൂർ നടത്തിയ പരാമര്‍ശത്തിനെതിരെയാണ് കടകംപള്ളി സുരേന്ദ്രൻ രംഗത്തെത്തിയത്. തരൂരിന് ഇത്രയും അഹങ്കാരം വേണ്ടെന്നും തിരുവനന്തപുരം പാര്‍ലമെന്റ് മണ്ഡലം ആരുടേയും സ്വകാര്യ സ്വത്തല്ലെന്നും കടകംപള്ളി സുരേന്ദ്രൻ പറഞ്ഞു.
‘ഇത്രയും arrogance വേണ്ട ശ്രീ തരൂർ. തിരുവനന്തപുരം പാർലമെന്റ് മണ്ഡലം ആരുടേയും സ്വകാര്യ സ്വത്തല്ല. കഴിഞ്ഞ 40 കൊല്ലമായി ജനങ്ങളുടെ ഇടയിൽ പ്രവർത്തിച്ച്, താങ്കൾ എം പി ആകുന്നതിനും മുമ്പ് ഈ അനന്തപുരിയുടെ സാരഥിയായ വ്യക്തിയാണ് പന്ന്യൻ രവീന്ദ്രൻ. തിരുവനന്തപുരത്തെ എല്ലാ ജനങ്ങൾക്കും രാഷ്ട്രീയഭേദമന്യേ താങ്കളേക്കാളും ബന്ധം പന്ന്യനുമായി ഉണ്ട്. കോടിശ്വരന്മാർ തമ്മിൽ മത്സരിക്കുമ്പോൾ പന്ന്യന് എന്ത് കാര്യമെന്ന് ധ്വനി വരുത്തുന്ന രീതിയിൽ പ്രതികരിക്കുന്ന താങ്കളുടെ ഈ വാക്കുകൾ വർഷങ്ങൾക്ക് മുമ്പ് തമ്പ്രാക്കന്മാർ അടിയാളന്മാരോട് പുച്ഛ ഭാവത്തിൽ പറയുന്നതായെ തോന്നുകയുള്ളൂ. ഇതിനുള്ള മറുപടി തിരുവനന്തപുരത്തെ ജനങ്ങൾ താങ്കൾക്ക് വരുന്ന ഏപ്രിൽ 26ന് നൽകുക തന്നെ ചെയ്യും. ഉറപ്പ്.’ കടകംപള്ളി സുരേന്ദ്രന്റെ ഫേസ്ബുക് പോസ്റ്റ്.
