ശബരിമലയിലേക്ക് പോകുന്ന യുവതികള്‍ അര്‍ബന്‍ നക്സലുകളും നിരീശ്വരവാദികളും അരാജകവാദികളുമാണെന്ന് കേന്ദ്ര വിദേശകാര്യ സഹമന്ത്രി വി മുരളീധരന്‍. വരുന്നവര്‍ യഥാര്‍ത്ഥ ഭക്തരാണോ എന്ന് പരിശോധിക്കണമെന്നും അദ്ദേഹം പറഞ്ഞു. വാര്‍ത്താ ഏജന്‍സിയായ എ.എന്‍.ഐയ്ക്ക് നല്‍കിയ അഭിമുഖത്തിലാണ് മുരളീധരന്‍ ഇക്കാര്യം പറഞ്ഞത്.
വിശ്വാസികള്‍ എന്ന വ്യാജേന ക്ഷേത്രത്തില്‍ പോകുന്ന ഇത്തരക്കാര്‍ അര്‍ബന്‍ നക്സലുകളും നിരീശ്വരവാദികളും അരാജകവാദികളുമാണ്. അവര്‍ യഥാര്‍ത്ഥ ഭക്തരാണെന്ന് താന്‍ വിശ്വസിക്കുന്നില്ല. ശബരിമല ക്ഷേത്രത്തില്‍ പോയി എന്ന് തെളിയിക്കുകയാണ് അവരുടെ ഉദ്ദേശം. അവര്‍ യഥാര്‍ത്ഥ ഭക്തരാണോ എന്ന് പരിശോധിക്കണമെന്നും മുരളീധരന്‍ പറഞ്ഞു.
Read more
ശബരിമലയുടെ പാരമ്പര്യം നിലനിര്‍ത്താന്‍ ശക്തമായ സമ്മര്‍ദ്ദമാണ് എല്‍ഡിഎഫ് സര്‍ക്കാരിന് മുകളിലുളളത്. ശബരിമല യുവതീപ്രവേശനവുമായി ബന്ധപ്പെട്ട ഹര്‍ജികളില്‍ സുപ്രീം കോടതി അന്തിമ തീരുമാനം കൈക്കൊണ്ടിട്ടില്ല.എങ്കിലും ശബരിമലയുടെ പാരമ്പര്യം അതേപോലെ തന്നെ കാത്തുസൂക്ഷിക്കണമെന്ന വികാരമാണ് എല്ലായിടത്തുമെന്നും മുരളീധരന്‍ പറഞ്ഞു. ഇതനുസരിച്ചുളള നടപടികളാണ് സംസ്ഥാന സര്‍ക്കാര്‍ സ്വീകരിക്കുന്നതെന്നും അദ്ദേഹം കൂട്ടിച്ചേര്‍ത്തു.
