മലപ്പുറത്തെ യുഡിഎഫ് പാർട്ടി ഓഫീസിൽ പെൻഷൻ വിതരണം ചെയ്തതിൽ വിശദീകരണവുമായി തദ്ദേശ വകുപ്പ് മന്ത്രി കെഎം ഷാജി. പെൻഷൻ വിതരണ ചുമതലക്കാരന് പനി ബാധിച്ചുവെന്നും അതിനാലാണ് പാർട്ടി ഓഫീസിൽ പെൻഷൻ വിതരണം നടത്തിയതെന്നും മന്ത്രി പറഞ്ഞു. പണം വിതരണം ചെയ്തുവെന്ന് പറയുന്ന ഓഫീസ് തിരഞ്ഞെടുപ്പിന് ശേഷം പാർട്ടി ഓഫീസായി പ്രവർത്തിച്ചിരുന്നില്ലെന്നും മന്ത്രി പറഞ്ഞു.
പാർട്ടി ഓഫീസിൽ പെൻഷൻ വിതരണം ചെയ്തത് കെ പ്രേംകുമാർ എംഎൽഎയാണ് നിയമസഭയിൽ ഉന്നയിച്ചത്. സാധാരണ നിലയിൽ നിന്ന് വ്യത്യസ്തമായാണ് പെൻഷൻ വിതരണം നടന്നിരിക്കുന്നതെന്ന് പറഞ്ഞ കെ പ്രേംകുമാർ ഇതെല്ലാം ക്രമവിരുദ്ധമായ നടപടിയാണെന്നും പറഞ്ഞു. സ്പീക്കറുടെ ശ്രദ്ധ ക്ഷണിക്കൽ ആയിട്ടാണ് വിഷയം അവതരിപ്പിച്ചതെന്നും എംഎൽഎ കൂട്ടിച്ചേർത്തു. എന്നാൽ അഴിമതി ആരോപണം ശ്രദ്ധ ക്ഷണിക്കലായല്ല അവതരിപ്പിക്കേണ്ടതെന്ന് സ്പീക്കർ പറഞ്ഞു.
Read more
അതേസമയം ക്ഷേമ പെൻഷൻ വിതരണത്തിൽ പരാതി ഉയർന്നിട്ടില്ലെന്ന് മന്ത്രി കെ എം ഷാജി മറുപടി പറഞ്ഞു. പെൻഷൻ വിതരണ ചുമതലക്കാരന് പനി ബാധിച്ചു. അതുകൊണ്ടാണ് ഇപ്രകാരം പെൻഷൻ നൽകേണ്ടി വന്നത്. ഉപഭോക്താക്കളുടെ ആവശ്യപ്രകാരമാണ് സമീപത്തെ മുറിയിലേക്ക് മാറ്റിയത്. പെൻഷൻ വിതരണ ഉദ്യോഗസ്ഥനെ ചുമതലയിൽ നിന്ന് നീക്കി.മേലാൽ ആവർത്തിക്കരുതെന്ന് താക്കീത് നൽകി. ഇനി ആവർത്തിക്കാതിരിക്കാൻ ഉള്ള നടപടിയെടുക്കുമെന്ന് മന്ത്രി കെഎം ഷാജി വ്യക്തമാക്കി.
