കണ്ണൂരിലെ മുസ്ലിം വിവാഹങ്ങളെ കുറിച്ച് നടി നിഖില വിമല്‍ ഉയര്‍ത്തിയ വിമര്‍ശനങ്ങള്‍ക്കെതിരെ ജമാ അത്തെ ഇസ്ലാമിയുടെ ഉടമസ്ഥഭതയിലുള്ള മീഡിയ വണ്‍ ചാനല്‍. കണ്ണൂരില്‍ മാത്രം നടക്കുന്ന കാര്യമല്ല, മുസ്ലിം പാരമ്പര്യത്തിന്റെ ഭാഗമാണിതെന്ന് ചാനല്‍ ന്യായീകരിക്കുന്നു. കല്ല്യാണത്തില്‍ മാത്രമല്ല, പള്ളിയിലും ഇങ്ങനെയൊക്കെ തന്നെയാണ്. ആണും പെണ്ണും ഇടകലര്‍ന്ന് ഇരിക്കാറില്ല. രണ്ടും പേരും രണ്ടു സ്ഥലത്താണ് ഇരിക്കാറുള്ളത്. ചാനലിന്റെ നിലപാട് പറയുന്ന ഔട്ട് ഓഫ് ഫോക്കസ് പരിപാടിയിലാണ് നിഖിലയുടെ വിമര്‍ശനങ്ങളെ ചാനല്‍ തുറന്ന് എതിര്‍ക്കുന്നത്.
മുസ്ലിം സമൂഹവുമായി ബന്ധപ്പെട്ട് പ്രത്യേകിച്ച് മുസ്ലിം സ്ത്രീകളുമായി ബന്ധപ്പെട്ട് എല്ലാത്തിനെയും പ്രശ്‌നവത്കരിച്ച് കാണുന്ന ഒരു സംസ്‌കാരം നിലനില്‍ക്കുന്നുണ്ട്. അത് കൂടിയാണ് നിഖില പറഞ്ഞത് ഇത്ര വിവാദമാകാന്‍ കാരണം. ഒരു ഭാഗത്ത് മുസ്ലിം സംരക്ഷണ ആങ്ങളമാര്‍ നിഖിലക്കെതിരെയും പുരോഗമന അമ്മാവന്‍മാര്‍ മുസ്ലിമിനെതിരെയും സംസാരിച്ചു തുടങ്ങി.
സ്ത്രീവിവേചനമല്ല കല്ല്യാണവേദികളില്‍ നടക്കുന്നത്. സ്ത്രീകളെ കയറ്റാതിരുന്നാല്‍ മാത്രമാണ് പ്രശ്‌നമാകുകയെന്നും മീഡിയ വണ്‍ പറയുന്നു. നിഖിലയ്ക്ക് അപരിചിതമായ സംസ്‌കാരങ്ങളും കാര്യങ്ങളും മോശം രീതിയാണെന്ന് നടി സ്ഥാപിച്ച് എടുക്കുകയാണ്. ഭക്ഷണം കഴിക്കുന്നത് ചോയിസുമായി ബന്ധപ്പെട്ട ഒരു കാര്യം കൂടിയാണ്. പുരുഷന്‍മാരോടൊപ്പമിരുന്ന് ഭക്ഷണം കഴിക്കുന്നതാണ് പുരോഗമനപരം, സ്ത്രീകള്‍ ഒറ്റക്കിരുന്ന് ഭക്ഷണം കഴിക്കുന്നത് പിന്തിരിപ്പത്തരം എന്നു പറയുന്നത് ശരിയല്ല. ഇതിനെ നടി പരിഹസിച്ചത് ശരിയല്ലെന്നും മീഡിയ വണ്‍ പറയുന്നു.
മുസ്ലിം സ്ത്രീകളെ നിരന്തരം പ്രശ്‌നവത്കരിക്കുക, പരിഹസിക്കുക, അതിനെ പൈശാചികവത്കരിക്കുക തുടങ്ങിയ കാര്യങ്ങളാണ് നടക്കുന്നത്. ‘അയല്‍വാശി’ എന്ന ചിത്രത്തിന്റെ പ്രമോഷന്റെ ഭാഗമായി നടന്ന അഭിമുഖത്തിലാണ് നിഖില മുസ്ലിം വിവാഹങ്ങളിലെ വിവേചനത്തെ കുറിച്ച് സംസാരിച്ചത്. ”നാട്ടിലെ കല്യാണത്തെ കുറിച്ചോര്‍ക്കുമ്പോള്‍ തലേന്നത്തെ ചോറും മീന്‍കറിയുമൊക്കെയാണ് മനസില്‍ വരിക. കോളജ് കാലഘട്ടത്തിലാണ് മുസ്ലിം കല്ല്യാണത്തിനൊക്കെ പോയിട്ടുള്ളത്.’
കണ്ണൂരിലൊക്കെ മുസ്ലിം കല്യാണത്തിന് അടുക്കള ഭാഗത്താണ് സ്ത്രീകളെ ഭക്ഷണം കഴിക്കാന്‍ ഇരുത്തുക. ഇപ്പോഴും അങ്ങനെ തന്നെയാണ് ചെയ്യുന്നതും. വലിയ മാറ്റമൊന്നും വന്നിട്ടില്ല. ആണുങ്ങളൊക്കെ പുറത്ത് നിന്നും പെണ്ണുങ്ങളൊക്കെ അടുക്കള ഭാഗത്തിരുന്നും കഴിക്കുമെന്നാണ് നിഖില പറഞ്ഞത്.
