കേരളത്തില്‍ രണ്ട് ദിവസത്തെ സന്ദര്‍ശനത്തിനെത്തുന്ന പ്രധാനമന്ത്രി നരേന്ദ്രമോദിക്കെതിരെ കെഎസ്‌യുവിന്റെ പ്രതിഷേധ ബാനര്‍. വൈകുന്നേരത്തോടെ കൊച്ചിയിലെത്തുന്ന പ്രധാനമന്ത്രി നഗരത്തില്‍ റോഡ് ഷോയില്‍ പങ്കെടുക്കാനിരിക്കെയാണ് പ്രതിഷേധവുമായി കെഎസ്‌യു രംഗത്തെത്തിയിരിക്കുന്നത്.
പ്രധാനമന്ത്രിയുടെ റോഡ് ഷോ കടന്നുപോകുന്ന എറണാകുളം ലോ കോളേജിന്റെ ഗേറ്റിലാണ് എ ബിഗ് നോ ടു മോദി എന്നെഴുതിയ പ്രതിഷേധ ബാനര്‍ ഉയര്‍ത്തിയിരിക്കുന്നത്. ബാനര്‍ നീക്കം ചെയ്യാന്‍ പൊലീസ് നിര്‍ദ്ദേശിച്ചെങ്കിലും കെഎസ്‌യു പ്രവര്‍ത്തകര്‍ തയ്യാറായില്ല. ബാനര്‍ അഴിച്ച് മാറ്റാന്‍ തയ്യാറല്ലെന്നും ക്യാമ്പസിനുള്ളിലാണ് ബാനര്‍ കെട്ടിയതെന്നും കെഎസ്‌യു അറിയിച്ചു.
ജനാധിപത്യമായി പ്രതിഷേധിക്കുന്നത് ആരുടെയും ഔദാര്യമല്ലെന്നും അവകാശമാണെന്നും കെഎസ്‌യു വ്യക്തമാക്കി. രാജ്യത്ത് വലിയ രീതിയിലുള്ള ജനാധിപത്യ വിരുദ്ധ സാഹചര്യങ്ങളാണ് നിലനില്‍ക്കുന്നത്. ഡല്‍ഹിയിലെ ഗുസ്തി താരങ്ങളുടെ പ്രതിഷേധത്തിലും മണിപ്പൂരിലെ പ്രശ്‌നങ്ങളിലും മൗനം പാലിക്കുന്ന പ്രധാനമന്ത്രി കേരളത്തില്‍ വരുമ്പോള്‍ മിണ്ടാതിരിക്കാന്‍ സാധിക്കില്ലെന്ന് കെഎസ്‌യു കൂട്ടിച്ചേര്‍ത്തു.
Read more
വൈകുന്നേരം 5ന് നെടുമ്പാശ്ശേരി വിമാനത്താവളത്തിലെത്തുന്ന പ്രധാനമന്ത്രി ഹോലികോപ്ടറില്‍ നാവിക സേന വിമാനത്താവളത്തിലെത്തും. വൈകുന്നേരം 6ന് മഹാരാജാസ് ഗ്രൗണ്ടില്‍ നിന്ന് ആരംഭിക്കുന്ന റോഡ് ഷോ സര്‍ക്കാര്‍ ഗസ്റ്റ് ഹൗസില്‍ അവസാനിക്കും. തുടര്‍ന്ന് ബുധനാഴ്ച രാവിലെ 6ന് ഗുരുവായൂരിലേക്ക് പോകും.
