കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടന്ന ശ്രീലങ്കയ്ക്കെതിരെ ഏകദിന പരമ്പര തൂത്തുവാരിയതിന് പിന്നാലെ ഇന്ത്യന് ടീമിനും വിരാട് കോലിക്കും ആശംസകളുമായി മുഖ്യമന്ത്രി പിണറായി വിജയന്. ബാറ്റ് കൊണ്ടും പന്തുകൊണ്ടും ഇന്ത്യന് ടീം നിറഞ്ഞാടിയപ്പോള് ഏകദിന ക്രിക്കറ്റ് ചരിത്രത്തിലെ റണ് അടിസ്ഥാനത്തിലുള്ള ഏറ്റവും മികച്ച വിജയമാണ് ഗ്രീന്ഫീല്ഡ് സ്റ്റേഡിയത്തില് രചിക്കപ്പെട്ടത്. ശ്രീലങ്കയ്ക്കെതിരായ മൂന്നാം ഏകദിന മത്സരത്തില് 317 റണ്സിന്റെ കൂറ്റന് വിജയമാണ് ടീം ഇന്ത്യ നേടിയതെന്ന് അദേഹം കുറിച്ചു.
മുഖ്യമന്ത്രിയുടെ പോസ്റ്റിന്റെ പൂര്ണരൂപം
”കാര്യവട്ടം ഗ്രീന്ഫീല്ഡ് സ്റ്റേഡിയത്തില് ഇന്ന് അക്ഷരാര്ത്ഥത്തില് ക്രിക്കറ്റ് കാര്ണിവല് തന്നെയായിരുന്നു. ബാറ്റ് കൊണ്ടും പന്തുകൊണ്ടും ഇന്ത്യന് ടീം നിറഞ്ഞാടിയപ്പോള് ഏകദിന ക്രിക്കറ്റ് ചരിത്രത്തിലെ റണ് അടിസ്ഥാനത്തിലുള്ള ഏറ്റവും മികച്ച വിജയമാണ് ഗ്രീന്ഫീല്ഡ് സ്റ്റേഡിയത്തില് രചിക്കപ്പെട്ടത്. ശ്രീലങ്കയ്ക്കെതിരായ മൂന്നാം ഏകദിന മത്സരത്തില് 317 റണ്സിന്റെ കൂറ്റന് വിജയമാണ് ടീം ഇന്ത്യ നേടിയത്.
ഇതോടെ 2008 ല് അയര്ലണ്ടിനെതിരെ ന്യൂസിലന്ഡ് നേടിയ 290 റണ്സിന്റെ റെക്കോര്ഡ് ജയം പഴങ്കഥയായി. വിരാട് കോഹ്ലിയുടെ നേതൃത്വത്തില് ഇന്ത്യന് ബാറ്റര്മാര് റണ്മഴ പെയ്യിച്ചപ്പോള് 3-0 നാണ് ഇന്ത്യ പരമ്പര തൂത്തുവാരിയത്. തന്റെ 46 ആം അന്താരാഷ്ട്ര ഏകദിന സെഞ്ച്വറിയാണ് വിരാട് കോഹ്ലി ഇന്ന് പൂര്ത്തിയാക്കിയത്. സച്ചിന് ടെണ്ടുല്ക്കറുടെ 49 സെഞ്ച്വറികളുടെ റെക്കോര്ഡിനൊപ്പമെത്താന് കേവലം മൂന്ന് സെഞ്ച്വറി കൂടി മതി കോഹ്ലിക്ക്. റെക്കോര്ഡിലേക്ക് കുതിക്കുന്ന വിരാട് കോഹ്ലിക്കും ടീം ഇന്ത്യക്കും ആശംസകള്”.
കാര്യവട്ടം ഏകദിനത്തില് ശ്രീലങ്കയ്ക്കെതിരെ ഇന്ത്യയ്ക്ക് 317 റണ്സിന്റെ പടുകൂറ്റന് വിജയമാണ് ഇന്ത്യ സ്വന്തമാക്കിയത്. ഇന്ത്യ മുന്നോട്ടുവെച്ച 391 റണ്സ് വിജയലക്ഷ്യത്തിലേക്ക് ബാറ്റേന്തിയ സന്ദര്ശകര് 73 റണ്സിന് ഓള്ഔട്ടായി. നാല് വിക്കറ്റ് വീഴ്ത്തിയ മുഹമ്മദ് സിറാജാണ് ലങ്കന് ബാറ്റിംഗ് നിരയെ തകര്ത്തത്.
ലങ്കന് നിരയില് രണ്ട് താരങ്ങള് മാത്രമാണ് രണ്ടക്കം കടന്നത്. 19 റണ്സെടുത്ത നുവാനിദു ഫെര്ണാണ്ടോയാണ് ലങ്കയുടെ ടോപ് സ്കോറര്. ഇന്ത്യയ്ക്കായി മുഹമ്മദ് ഷമി, കുല്ദീപ് യാദവ് എന്നിവര് രണ്ടു വിക്കറ്റ് വീതം വീഴ്ത്തി. മത്സരത്തില് ടോസ് നേടി ബാറ്റിംഗിനിറങ്ങിയ ഇന്ത്യ 5 വിക്കറ്റ് നഷ്ടത്തില് 390 റണ്സെടുത്തു. ശുഭ്മാന് ഗില്ലിന്റെയും വിരാട് കോഹ് ലിയുടെയും സെഞ്ച്വറി പ്രകടനമാണ് ഇന്ത്യയ്ക്ക് കൂറ്റന് സ്കോര് സമ്മാനിച്ചത്.
Read more
കോഹ്ലി 110 ബോളില് 8 സിക്സിന്റെയും 13 ഫോറിന്റെയും അകമ്പടിയില് 166* റണ്സെടുത്തു പുറത്താകാതെനിന്നു. ഏകദിനത്തില് കോഹ് ലിയുടെ 46ാമത്തെയും ഇന്ത്യയിലെ 21ാം സെഞ്ച്വറിയുമാണിത്. ശുഭ്മാന് ഗില് 97 പന്തില് നിന്ന് 14 ഫോറുകളും രണ്ട് സിക്സറുകളും സഹിതം 116 റണ്സെടുത്തു. നായകന് രോഹിത് ശര്മ്മ 42, ശ്രേയസ് അയ്യര് 38, കെഎല് രാഹുല് 7, സൂര്യകുമാര് 4 എന്നിവരുടെ വിക്കറ്റുകളാണ് ഇന്ത്യയ്ക്ക് നഷ്ടമായത്. ലങ്കയ്ക്കായി ലഹിരു കുമാര, കസുന് രജിത എന്നിവര് രണ്ട് വിക്കറ്റ് വീതവും ചമിക കരുണരത്നെ എന്നിവര് ഓരോ വിക്കറ്റ് വീതം വീഴ്ത്തി. ആദ്യ രണ്ട് മത്സരങ്ങളും ജയിച്ച് ഇന്ത്യ പരമ്പര നേരത്തെ സ്വന്തമാക്കിയിരുന്നു.