വിദ്വേഷ പ്രസംഗത്തിന്റെ പേരില് മുന് എംഎല്എ പിസി ജോര്ജിനെ വീട്ടില് അതിക്രമിച്ച് കയറി പൊലീസ് കസ്റ്റഡിയിലെടുത്ത സംഭവത്തെ വിമര്ശിച്ച് ബിജെപി സംസ്ഥാന അധ്യക്ഷന് കെ സുരേന്ദ്രന്. പൊലീസിന്റെ നടപടി അഭിപ്രായ സ്വാതന്ത്രത്തിന് മേലുള്ള കടന്നു കയറ്റമാണ്. കേരളത്തിലെ അറിയപ്പെടുന്ന മുതിര്ന്ന രാഷ്ട്രീയ നേതാവിനെയാണ് ഒരു പ്രസംഗത്തിന്റെ പേരില് പുലര്ച്ചെ വീട്ടിലെത്തി കസ്റ്റഡിയിലെടുത്തിരിക്കുന്നത്. പിസി ജോര്ജിനെ മൂന്ന് മണിക്കൂര് ദൂരെയുള്ള പൊലീസ് സ്റ്റേഷനിലേക്ക് കൊണ്ടുപോകുന്നത് പിണറായി സര്ക്കാരിന്റെ ഫാസിസ്റ്റ് സമീപനത്തിനുള്ള തെളിവാണെന്നും സുരേന്ദ്രന് കുറ്റപ്പെടുത്തി.
മുസ്ലിം മതമൗലികവാദികള് വര്ഗീയ വിഷം ചീറ്റിയിട്ടും സര്ക്കാര് ഒരു നടപടിയും എടുത്തിട്ടില്ല. പിസി ജോര്ജിനെ കസ്റ്റഡിയിലെടുത്തതോടെ സര്ക്കാരിന്റെ ഇരട്ടത്താപ്പാണ് വ്യക്തമാകുന്നത്. ഇസ്ലാമിക വര്ഗീയ ശക്തികള്ക്ക് എന്തും പറയാം എന്തും ചെയ്യാം, ആരും ഇതിനെതിരെ പ്രതികരിക്കരുതെന്നാണ് പിണറായി വിജയന് പറയുന്നത്. പക്ഷേ ബിജെപി അത് അംഗീകരിച്ചു തരാന് തയ്യാറല്ല. ജിഹാദികള്ക്ക് മുന്നില് മുട്ടിലിഴയുന്ന സര്ക്കാര് ഹൈന്ദവ-ക്രൈസ്തവ നേതാക്കളെ വേട്ടയാടുകയാണ്. സര്ക്കാരിന്റെ ഇത്തരം ജനാധിപത്യവിരുദ്ധ സമീപനത്തിനെതിരെ ബിജെപി ജനങ്ങളെ അണിനിരത്തി പ്രതിഷേധിക്കുമെന്നും സുരേന്ദ്രന് പറഞ്ഞു.
പിണറായി വിജയന് ഭരണത്തിന് കീഴില് കേരളത്തില് ഇരട്ട നീതിയെന്ന് ബിജെപി നേതാവ് സന്ദീപ് വചസ്പതിയും പ്രതികരിച്ചിരുന്നു. മത ഭീകരവാദികള്ക്കും പിണറായി വിജയന്റെ കുഴലൂത്തുക്കാര്ക്കും ഒരു നീതിയും സത്യം വിളിച്ച് പറയുന്നവര്ക്ക് മറ്റൊരു രീതിയുമാണ് ഇപ്പോള് കേരളത്തില്. ഇങ്ങനെ കേരളീയ സമൂഹത്തെ വിഭജിക്കാനാണ് കമ്യൂണിസ്റ്റുകാര് ശ്രമിക്കുന്നതെന്നും അദ്ദേഹം പറഞ്ഞു.
ഹിന്ദു മഹാസമ്മേളത്തിന്റെ മൂന്നാം ദിന സമ്മേളനം ഉദ്ഘാടനം ചെയ്ത് സംസാരിക്കവെയായിരുന്നു പി സി ജോര്ജ്ജ് വിവാദ പരാമര്ശം നടത്തിയത്. യൂത്ത്ലീഗ് ഉള്പ്പെടെ പരാതിയുമായി രംഗത്തെത്തുകയും ചെയ്തു. പിന്നാലെയാണ് ഇന്ന് പുലര്ച്ചെ അഞ്ച് മണിക്ക് പിസി ജോര്ജ്ജിന്റെ ഈരാറ്റുപേട്ടയിലെ വീട്ടിലെത്തി ഫോര്ട്ട് പൊലീസ് അദ്ദേഹത്തെ കസ്റ്റഡിയിലെടുത്തത്. മുപ്പതോളം പേരടങ്ങുന്ന സംഘമായിരുന്നു എത്തിയത്. പിസി ജോര്ജ്ജിനെ തിരുവനന്തപുരത്തേക്ക് കൊണ്ടുവരികയാണ്. സ്വന്തം വാഹനത്തിലാണ് പിസി ജോര്ജ് തിരുവനന്തപുരത്തേക്ക് തിരിച്ചിട്ടുള്ളത്
Read more
ജാമ്യമില്ലാ വകുപ്പ് പ്രകാരമാണ് പി സി ജോര്ജിനെതിരെ പൊലീസ് കേസെടുത്തിരിക്കുന്നത്. തിരുവനന്തപുരം ഫോര്ട്ട് പൊലീസാണ് പി സി കേസെടുത്തത്. ഡിജിപി അനില് കാന്തിന്റെ നിര്ദ്ദേശ പ്രകാരമാണ് നടപടി. ഹിന്ദു മുസ്ലീം വൈരം ഉണ്ടാക്കുന്ന രീതിയിലും മതസ്പര്ധ വളര്ത്തുന്ന രീതിയിലും പ്രകോപനപരമായി പ്രസംഗിച്ചതിനാണ് കേസെടുത്തിരിക്കുന്നതെന്നാണ് എഫ്ഐആറില് പറഞ്ഞിരിക്കുന്നത്.