ഉല്ലാസം സിനിമയുടെ ഷൂട്ടിംഗുമായി നിസഹകരിക്കുന്നെന്ന പരാതിയ്ക്ക് പിന്നാലെ ഷെയ്ന്‍ നിഗത്തിനെതിരെ പരാതിയുമായി ഉല്ലാസം സിനിമയുടെ നിര്‍മ്മാതാക്കള്‍. ചിത്രത്തില്‍ അഭിനയിക്കുന്നതിന് 30 ലക്ഷം രൂപയാണ് ഷെയ്‌നുമായുള്ള കരാറെന്നും എന്നാല്‍ പിന്നീട് 45 ലക്ഷം രൂപ തരണമെന്ന് ഷെയ്ന്‍ ആവശ്യപ്പെട്ടന്നുമാണ് ഉല്ലാസത്തിന്റെ നിര്‍മ്മാതാക്കള്‍ പ്രൊഡ്രൂസേഴ്‌സ് അസോസിയേഷന് നല്‍കിയ പരാതിയില്‍ പറയുന്നത്. സിനിമയുടെ പ്രൊഡക്ഷന്‍ കണ്‍ട്രോളര്‍ ഷാഫി ചെമ്മാടിനോട് കരാര്‍ തുകയിലും കൂടുതല്‍ പ്രതിഫലം ഷെയ്ന്‍ ചോദിക്കുന്നതിന്റെ ഓഡിയോ ക്ലിപ്പും പുറത്തുവിട്ടിട്ടുണ്ട്.
സിനിമ പുറത്തിറങ്ങുന്ന സമയത്തെ തന്റെ സ്റ്റാര്‍ വാല്യു പണ്ടുള്ളതിനേക്കാള്‍ വലുതാണെന്നും ഇനി മുതല്‍ 45 ലക്ഷമാണ് ചോദിക്കുന്നതെന്നും രണ്ട് സിനിമ കഴിഞ്ഞാല്‍ 75 ലക്ഷമായിരിക്കുമെന്നും അതിന് ശേഷം ഒരു കോടിയാണ് പ്രതിഫലം ചോദിക്കുകയെന്നും ഷെയ്ന്‍ ഓഡിയോയില്‍ പറയുന്നുണ്ട്. 30 ലക്ഷം ഇപ്പോള്‍ തന്നതിന് ശേഷം ഷെയര്‍ നല്‍കുകയോ അല്ലെങ്കില്‍ ഡിജിറ്റല്‍ റൈറ്റ്‌സ് എഴുതി തരുകയോ ചെയ്താല്‍ മതിയെന്നും ഷെയ്ന്‍ വ്യക്തമാക്കുന്നുണ്ട്.
കൈതമറ്റം ബ്രദേഴ്‌സിന്റെ ബാനറില്‍ ജോ കൈതമറ്റം, ക്രിസ്റ്റി കൈത മറ്റം എന്നിവര്‍ ചേര്‍ന്നാണ് ഉല്ലാസം നിര്‍മ്മിക്കുന്നത്. സംഗീതത്തിനും നൃത്തത്തിനും ഏറെ പ്രാധാന്യം നല്‍കി ഒരുങ്ങുന്ന ഉല്ലാസം നവാഗതനായ ജീവന്‍ ജിയോ ആണ് ചിത്രം സംവിധാനം ചെയ്യുന്നത്.
Read more
