തിയേറ്ററില്‍ പ്രദര്‍ശനം തുടരുന്നതിനിടെ ടൊവിനോ തോമസിന്റെ ‘അന്വേഷിപ്പിന്‍ കണ്ടെത്തും’ ഒ.ടി.ടിയിലേക്ക്. നവാഗതനായ ഡാര്‍വിന്‍ കുര്യാക്കോസ് സംവിധാനം ചെയ്ത ചിത്രം നെറ്റ്ഫ്‌ളിക്‌സിലാണ് റിലീസ് ചെയ്യുന്നത്. ഫെബ്രുവരി 9ന് തിയേറ്ററുകളിലെത്തിയ അന്വേഷിപ്പിന്‍ കണ്ടെത്തും മാര്‍ച്ച് 8ന് ഒ.ടി.ടിയില്‍ എത്തും.
ബോക്‌സ് ഓഫീസില്‍ 40 കോടി പിന്നിട്ട ചിത്രം ഫെബ്രുവരി റിലീസുകളില്‍ 50 കോടി കളക്ഷന്‍ മറികടക്കാത്ത ചിത്രങ്ങളില്‍ ഒന്നാണ്. ‘ഭ്രമയുഗം’, ‘പ്രേമലു’, ‘മഞ്ഞുമ്മല്‍ ബോയ്‌സ്’ എന്നീ ചിത്രങ്ങള്‍ക്കൊപ്പം കട്ടയ്ക്ക് പിടിച്ചു നിന്ന ചിത്രത്തിന് തിയേറ്ററുകള്‍ കുറയുകയായിരുന്നു. എങ്കിലും തിയേറ്ററില്‍ നിന്നും മികച്ച പ്രതികരണമായിരുന്നു ചിത്രത്തിന് ലഭിച്ചത്.
മലയാളത്തിനൊപ്പം തമിഴ്, തെലുങ്ക്, കന്നഡ, ഹിന്ദി ഭാഷകളിലും ചിത്രം നെറ്റ്ഫ്‌ളിക്‌സില്‍ എത്തും. തൊണ്ണൂറുകളുടെ ആരംഭത്തില്‍ കേരളത്തില്‍ ഏറെ വിവാദമായ രണ്ട് കൊലപാതകങ്ങളും അതിന് പിന്നാലെ നടന്ന സംഭവ പരമ്പരകളുമൊക്കെയാണ് ചിത്രം ചര്‍ച്ച ചെയ്തത്. എസ് ഐ ആനന്ദ് നാരായണന്‍ എന്ന പോലീസ് ഉദ്യോഗസ്ഥനായാണ് ടൊവിനോ ചിത്രത്തില്‍ എത്തിയത്.
സിദ്ദിഖ്, ഇന്ദ്രന്‍സ്, ഷമ്മി തിലകന്‍, ബാബുരാജ്, നന്ദു, ഹരിശ്രീ അശോകന്‍, പ്രമോദ് വെളിയനാട്, വിനീത് തട്ടില്‍, വെട്ടുകിളി പ്രകാശ്, രമ്യാ സുവി, അനഘ മായ രവി, അശ്വതി മനോഹരന്‍, അര്‍ത്ഥന ബിനു തുടങ്ങി നിരവധി താരങ്ങള്‍ ചിത്രത്തില്‍ എത്തിയിരുന്നു.
Read more
തീയറ്റര്‍ ഓഫ് ഡ്രീംസിന്റെ ബാനറില്‍ ഡോള്‍വിന്‍ കുര്യാക്കോസ്, ജിനു വി. എബ്രാഹാം, വിക്രം മെഹ്‌റ, സിദ്ധാര്‍ഥ് ആനന്ദ് കുമാര്‍ എന്നിവര്‍ ചേര്‍ന്നാണ് നിര്‍മ്മിച്ചിരിക്കുന്നത്. ചിത്രത്തിന് തിരക്കഥ ഒരുക്കിയിരിക്കുന്നത് ജിനു വി എബ്രാഹാമാണ്.
