പുതിയ മ്യൂസിക് വീഡിയോയിൽ ഹിന്ദു ദേവതയായ കാളിയെ ചിത്രീകരിച്ചതിന് വിമർശനങ്ങൾ നേരിടുകയാണ് ഇന്ത്യൻ വംശജയായ റാപ്പർ ടോമി ജെനസിസ്. തന്റെ പുതിയ വിഡിയോ ആൽബം ‘ട്രൂ ബ്ലൂ’ പുറത്തുവന്നതിന് പിന്നാലെയാണ് ടോമി വിവാദത്തിലായിരിക്കുന്നത്.

ശരീരത്തിൽ നീല ചായം പൂശി, സ്വർണ്ണ നിറത്തിലുള്ള ബിക്കിനി, പരമ്പരാഗത സ്വർണ്ണാഭരണങ്ങൾ എന്നിവ ധരിച്ചാണ് ജെനസിസ് വിഡിയോയിൽ പ്രത്യക്ഷപ്പെടുന്നത്. ഹിന്ദു, ക്രിസ്ത്യൻ വികാരങ്ങളെ വ്രണപ്പെടുത്തുന്ന വീഡിയോയാണെന്ന് ആരോപിച്ച് നിരവധി സോഷ്യൽ മീഡിയ ഉപയോക്താക്കളാണ് വീഡിയോയെ വിമർശിക്കുന്നത്.

ഹിന്ദു സംസ്കാരത്തെ അധിക്ഷേപിച്ചു, കാളിയെ മോശം രീതിയിൽ അവതരിപ്പിച്ചു, ക്രിസ്ത്യാനിറ്റിയെ ആക്ഷേപിച്ചു തുടങ്ങിയ വിമർശനങ്ങളാണ് റാപ്പർക്കെതിരെ ഉയരുന്നത്. നിരവധി പേർ വീഡിയോ ഡിലീറ്റ് ചെയ്യണം എന്ന് ആവശ്യപ്പെട്ടുകൊണ്ടും രംഗത്തെത്തിയിട്ടുണ്ട്.

കാനഡയിലെ വാൻകൂവറിൽ ജനിച്ചു വളർന്ന ടോമി ജെനസിസിന്റെ അച്ഛൻ ദക്ഷിണേന്ത്യയിൽ നിന്നുള്ള ഒരു തമിഴ്-മലയാളി ക്രിസ്ത്യാനിയാണ്. അമ്മ സ്വീഡിഷ് വംശജയാണ്. 2013ൽ പുറത്തിറങ്ങിയ ‘വേൾഡ് വിഷൻ’ ‌ആണ് ജെനസിസിന്റെ ആദ്യ ആൽബം.