ജോജു ജോര്‍ജിനെയും മഞ്ജു വാര്യരെയും കേന്ദ്ര കഥാപാത്രങ്ങളാക്കി റോഷന്‍ ആന്‍ഡ്രൂസ് പ്ലാന്‍ ചെയ്ത ചിത്രമാണ് “പ്രതി പൂവന്‍കോഴി”. എന്നാല്‍ പിന്നീട് ജോജു ചിത്രത്തില്‍ നിന്നും പിന്മാറിയിരുന്നു. പ്രതിഫല പ്രശ്‌നമാണ് ചിത്രത്തില്‍ നിന്നും പിന്മാറാകാന്‍ പ്രേരകമായത്. അതിനാല്‍ ആ വേഷം റോഷന്‍ ആന്‍ഡ്രൂസ് തന്നെയാവും ചെയ്യുക. പ്രതിനായക വേഷമാണ് റോഷന്‍ കൈകാര്യം ചെയ്യുക.
“ഒരാഴ്ചത്തെ ജോലിക്ക് പലരും പറഞ്ഞ പ്രതിഫലം ഈ സിനിമയ്ക്ക് ചേരുന്നതായിരുന്നില്ല. ഞാന്‍ എന്റെ സിനിമയില്‍ കഥാപാത്രങ്ങള്‍ക്കാണ് പ്രതിഫലം നിശ്ചയിക്കുന്നത്, താരങ്ങള്‍ക്കല്ല. അതുകൊണ്ടാണ് ഈ വേഷം ചെയ്യാന്‍ ഞാന്‍ തീരുമാനിച്ചത്. അഭിനയത്തോട് ഇഷ്ടമുണ്ടെങ്കിലും അഭിനയിപ്പിക്കുന്ന സംവിധായകനാകാനാണ് കൂടുതല്‍ ഇഷ്ടം.” റോഷന്‍ ആന്‍ഡ്രൂസ് പറഞ്ഞു.
Read more
ഉണ്ണി ആറിന്റെ നോവല്‍ “പ്രതി പൂവന്‍കോഴി”യാണ് സിനിമയാകുന്നത്. ഉണ്ണി തന്നെയാണ് ചിത്രത്തിന് തിരക്കഥയും ഒരുക്കുന്നത്. ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലനാണ് നിര്‍മ്മാണം. ജി ബാലമുരുകന്‍ ഛായാഗ്രഹണം നിര്‍വ്വഹിക്കുന്ന ചിത്രത്തിന് ഗോപി സുന്ദറാണ് സംഗീതമൊരുക്കുന്നത്.
