രോമാഞ്ചം എന്ന സൂപ്പർ ഹിറ്റ് ചിത്രത്തിന് ശേഷം ജിതു മാധവൻ സംവിധാനം ചെയ്ത് ഫഹദ് ഫാസിൽ നായകനായെത്തിയ ‘ആവേശം’ മികച്ച പ്രേക്ഷക പ്രതികരണങ്ങളോടെ മുന്നേറുകയാണ്. ഫഹദിന്റെ അഭിനയ ജീവിതത്തിലെ ഏറ്റവും മികച്ച കഥാപാത്രം കൂടിയാണ് ആവേശത്തിലെ രംഗ.
ബംഗളുരുവിലെ ഒരു കോളേജ് പശ്ചാത്തലത്തിലുള്ള 3 മലയാളി വിദ്യാർത്ഥികളുടെ കഥയും ശേഷം അവർ നേരിടുന്ന ചില പ്രശ്നങ്ങൾക്ക് രംഗ എന്ന ലോക്കൽ ഗുണ്ടാ നേതാവിന്റെ സഹായം തേടുന്നതും തുടർന്നുള്ള രസകരമായ സംഭവ വികാസങ്ങൾ ബ്ലാക്ക് ഹ്യൂമറിന്റെയും ഗ്യാങ്ങ്സ്റ്റർ സ്പൂഫിന്റെയും പശ്ചാത്തലത്തിൽ പറയുന്നതുമാണ് ആവേശത്തിന്റെ പ്രമേയം.
രംഗണ്ണന്റെ ‘കരിങ്കാളി’ റീൽ തിയേറ്ററിൽ വലിയ രീതിയിൽ ചിരിപടർത്തിയ ഒരു രംഗമായിരുന്നു. ശേഷം ടാലന്റ് ടീസർ എന്ന പേരിൽ നിർമ്മാതാവ് അൻവർ റഷീദ് പങ്കുവെച്ച റീൽ വലിയ രീതിയിൽ വൈറലായിരുന്നു. രണ്ട് ദിവസംകൊണ്ട് 1 മില്ല്യൺ വ്യൂസാണ് വീഡിയോക്ക് ലഭിച്ചിരിക്കുന്നത്. ഇപ്പോഴിതാ റീലിലെ ഒരു ഡയറക്ടർ ബ്രില്ല്യൻസാണ് സോഷ്യൽ മീഡിയയിൽ ചർച്ചയാവുന്നത്. രംഗയുടെ യഥാർത്ഥ പേര് രഞ്ജിത്ത് ഗംഗാധരൻ ആണെന്നാണ് സോഷ്യൽ മീഡിയയിലെ ചർച്ചാവിഷയം. കരിങ്കാളി റീലിൽ താഴെ ഒർജിനൽ ഓഡിയോ ബൈ രഞ്ജിത് ഗംഗാധരൻ എന്നും കാണാം. അതുകൊണ്ട് തന്നെ രംഗണ്ണന്റെ സ്വന്തം അക്കൗണ്ട് ആണിതെന്നും, യഥാർത്ഥ പേര് രഞ്ജിത്ത് ഗംഗാധരൻ ആണെന്നുമുള്ള ഡയറക്ടർ ബ്രില്ല്യൻസ് ആണ് ചർച്ചാവിഷയം.
അൻവർ റഷീദ് എന്റർടൈൻമെന്റ്സ്, ഫഹദ് ഫാസിൽ ആൻഡ് ഫ്രണ്ട്സിന്റെ ബാനറിൽ അൻവർ റഷീദ്, നസ്രിയ നസിം എന്നിവർ ചേർന്നാണ് ചിത്രം നിർമിക്കുന്നത്. ജിതു മാധവൻ തന്നെയാണ് ചിത്രത്തിന് തിരക്കഥ രചിച്ചിരിക്കുന്നത്.
മൻസൂർ അലി ഖാൻ, ആശിഷ് വിദ്യാർഥി, സജിൻ ഗോപു, പ്രണവ് രാജ്, ഹിപ്സ്റ്റർ, മിഥുൻ ജെ.എസ്, റോഷൻ ഷാനവാസ്, ശ്രീജിത്ത് നായർ, പൂജ മോഹൻരാജ്, നീരജ രാജേന്ദ്രൻ, തങ്കം മോഹൻ എന്നിവരാണ് ചിത്രത്തിലെ അഭിനേതാക്കൾ.
